حسبالي گد كلمتك

[عطري وجودك]

بهداي حط عالجرح
ضمّادة خل ارتاح
جبتك تداوي الجرح
مو تحط فوگه اجراح
بهداي ، گلبي رِخي
وحمولك اثگيلة
تَعّبت عمري الگضا
خُف عاللّي باقي له !
اشذنبه الگلب من عطش
ما ضاگ الِتمناه …
ولبسته ثوب الحزن
تطريزه من الآه
ما ولّهتني ابعشگ
يا مال من طرواي
چانت مشيتك رمح
كل خطوة دگ ب اعضاي
من چنت خمرة ، چنت
بهداي المن بيك …
چا هيچ صار الجِزا ؟
اتطشّر دمع راعيك !
حسبالي گد كلمتك
والشينة متلوحك
چا من تِفض عشرتك
إلّا ابرخص روحك .. !
ما غرى اعيونك نهر
اتحب بالسراب اتديح
انت الطفيت الشمع
مو زحمة الوم الريح
صاعد قطار الغرب
مو عن قناعة وراي
چنك اوراق المشت
مغصوبة فوگ الماي
يا گلبي غلطة وبعد
بطّل لتحچي لِي
اشعندي دخلت ابعشگ
ماخذني من حيلي !
يا عيني ليش الأمل ؟
ما بقت بوب اعتاب !
هيه خيانة ضوى
مَد روحه للسرداب …






حسين سعد