هذه الكلمات عن لسان حال فتاة
انتظرت عشقها ..طويلاً
انتظرت عشقها ..طويلاً
دوريتك..
عفت إعيوني عله دربك
هلبت چذب مرة بيها تصدف
دوريتك..
بالسوالف..
بالمحاضن
هنا يالاهي وما عرفتك
بذات وطبع گلبك مايوالف
دوريتك ..
بين سعفات العمر تمرة
وبين شوغات الروح فرحة
وبين صفنات أعيوني والمساهر
بالليالي وظلمها
وبالسواد المرسوم عله جفني
وصرت إبلياك عمر تالف
دوريتك ..دوريتك
بالامس وكسر الخواطر
بالبواچي العمت ليل السوالف
دوريتك..
وانشدت كل عرف مر عله بالي
وتعنيت لابو الحسنين
متحيرة أدورلي إلك چاره
ومشيت متحفيه للزيارة
وكلي أرعش وگلبي خايف
دوريتك..
بالمحاضن والدواشگ
ورعشات ايدك بخصري
وبغفوة گمرنه الحط ضواه
ما بينك وبيني والچراچف
دوريتك..
يلچنت ضحكت اورود البنفسج
ومن معزتك حتى أنته كرهتك
أتوچه چذب وأتلفلف بعباتي
وأگلك ماشيه ما أوالف
دوريتك..
وكل الفات بلياك شوغات وهضم
وأنته أدرى الناس بلوعات گلبي
أشيل جروح منك يابو اجروح
وكلها بچذبة أنساها وأرد أوالف
دوريتك..
وشگد لحلمك آنه تنيت
ألبسلك وأكحلك
وأفرش العنبر بكل حجرنه
وأبخر البيت يلماجيت
دوريتك..
09/01/2016
العــ عقيل ـراقي
