اعله شما عليت وشوفني من بعيد
باجر من كرب تستحي تعاينلي
ما اعطش واجيك اتوسلك محتاج
وما اصعدلك انه وانته تنزللي
عالقمه الثلج وينزعه وجه الصيف
وغصبن عالعطش شلال توصلي
اشربك وارتوي تعطشني ما ارويك
دنيه من العطش ماترتوي بذلي
علّي دليت خصمي بسر دفنته وياي
وانه الدافنك كلك ولا دلي
شفتهم طحت شفت الصحابه وجوه
اعرفت ياوجه ضدي ويا وجه خلي
شالني الجفوف الحاربني سنين
المالطمن علّي جانن يصفكلّي
شفت مصيوب طايح طحت راد يكوم
وعله حرورة صوابه جدامه زحفنلي
وشفت واكف بعدني وكال راح يطيح
وشفت كبل المزامط صاح متخلي
اكو مجروح مذنب جرحه يشفع بيه
واكو يزيدن ذنوبه شما يجي يصلّي
واكو يختل بضلمه ومنه ماينخاف
واكويخوفني لو بالنور يختلي
واكو عالي وتشوفه عيونك برجليك
واكو جواك ناصي تشوفه متعلي
واكو ميت عطش وجفوفه تمطر ماي
جفه بحلك غيره تعلم يخلي
رهنت له ضميرك ردت توصل صوت
هسه بلايه صوت شتحجي شتكلي؟
اذا بجفوفك تأشرلي عنهم جاي
اعمه وشفتهم لوردت تنقلي
انه اكبالك من شال اسمك طاح
عاد اسمك دشيله الشايله يولي
ما أقبل اهدومي تضمني عن السيف
واكطعهن جفوفي المايفزعنلي
وما اقبل خيالي يعيش تعبي وياي
نزلت الشمس لمن تعب ضلي
راق لي
