عراقيين

[آهات حالمه]

عراقيين
حدر كل ليله منسيه ضباب اسود
يزتنه ل زحمة التاريخ..
ونرد بينه ضمه وسجيل

منسيين ...
من طحنه اعله وجه الگاع منسيين..
وك يا ليل باصرني...
اشتهيت ارثي العراقيين..

هذوله احنه الكلانه الطين...
مهمومين لاخر نجمه بالميلاد مهمومين..

احنه الوهگ بينه العوز
المدري ل يا سمه امغربين

اشنعود ل عيسى مصلوبين ..!

شعب من باگو ب طوله قره بينه الحزن ترتيل...!
شعب متعوب..
من اول عضه بالتفاح لاخر جيل ...

چا شنگول للساعي لون باگو رسايلنه...
وبيش نسامر العشاگ لو گصو ضفايرنه...
لا ضل للوطن شفه ولا فزعت صرايفنه..
ضعنه بحجة الباچر تدلينه عمايمنه...!

اشنحط بيهه قصايدنه !

غاد امن السهر حلمين
وامرورة امزاود ليل مرسومه عله الضويات

ونتوكل ل باب الله سواد اهموم
وحدر كل عين خدرانه دمعنه ايبات...

الشمس مسحت معانينه صفينه اتغثنه الامرايات..

اشيسد كسرة خواطرنه..
مكسورين كسرة خاطر احديثات...

دلينه يرب الطين
چا ليش الفراش ايطير من هدومنه الحلوات...!

محترگين
والموسم حطب والنار تتمشه بخواصرنه ..

احنه المحد بسدنه !

غربه ابين الولايات.
ما ضل باب يتنسه ل اصابعنه ...

وكتبنه ولا يصح ساعي يوصلهه رسايلنه...

ما ضل للاعتاب اشفاف صبحنه صراير ضيم

چا من عطش بينه الحيل
ما نده اعله فينه الغيم !

مگيودين
مدري ليا صنم وال اخ تتمشه بضمايرنه

وضعنه ولا يصح بينه نبي ابراهيم

عراقيين
نمشي اويه التعب مرسال
ما صح ليل يقرانه اعله فطرتنه.

شني بيا ديره عازتنه
مهي سابع سمه اعله الگاع‌ ذبتنه

العمر شيريد
غير التعب والحرمان ما عدنه..

تيممنه مسية اغروب
وصلينه صلاة الخوف

خطيه اگلوب الاحبيبات
دمعنه ايبلل الموعد لحد ما يعتگ النفنوف

هذوله احنه مطر عالگاع
يبسنه وما لگينه اجروف

ومن شح الفرح بالناس واحدنه ركض زافوف

لا نمنه رغد عالگاع
ولا ضاگت الشفه التوت..

حدرنه ايخزن المغبون
ويحط بينه حزن مبخوت

وصرخنه وصوت يتبع صوت

چا ليش المناره تموت...!
ليش تموت

حسن وصفي..

 

[بنت العز]

كلمات جميله
احسنتي الاختيار

 

[آهات حالمه]

شكرا للمرور الكريم
تقديري

 

[رمااد اانسان]

جهد واختيار موفق يستحق الشكر والثناء
ارق تحية عطرة

 

[فواز]

الله يسعدكك
طرح قيييم
ومميز
سسسلمت الايادي