قصيدة بين الحب والكبرياء
تأخرتوا علي طولتوا يمه
قلقتوني شنو الشغلة المهمة
مو مشكلة احجولي شكَال ما كَال
اشم بثيابكم ريحة مذمة
صرت ماضي ونساني وما اهمه
انتهى كلشي ويريد ابري الذمة
انه تخوني ذاكرتي مرات
رحمة لوالديكم هو شسمة
حسباله يجيني الخبر وانهار
سبع سنين اظل عايش الصدمة
امشي عله البحر اكَضيها صفنات
احب ضي الكَمر وتحبني نجمة
واشخبط ع الرمل وابنيله تمثال
واظل ابجي وتجي الروجه وتهدمه
ويملون اهلي من الاطباء
يتجهون بية عله الائمة
خطية هواي يحلم رايح بعيد
وفرق ما بين حلمي وبين حلمه
حلم مرة حلمت جن امشي وياك
حلم زرت الحلم كَصيت جدمه
ناصبلة مشانق حتى بالبال
بس يخطف طاريه علي اعدمه
انه وثم انه وكان من كان
اصبعين عله روحي ما اقدمه
كَلكٌم عافني ويرجعلي هيهات !!!
جا شمتاني ميسويله هِمه !
انا البايكَـ ضواه خلي سنه يغيب
وترس ريتي هواه ما حاجه اشمه
السواه سوه غيره هواي عشاكَـ
ينتظروني آشرلهم لعلمه
بس هو صدكَـ ما كَال مشتاكَـ ؟
لا يشتاكَـ لا فد ... هي قسمة
شبيها عيوني يمكن لاحها تراب -_
ماباجي عسى بهاللحظه تعمه
خابرته شوكت ؟؟ بالغلط دكَيت
مرتين وطلع خارج الخدمة
من يمهم فتت !! أي يعني وشصار ؟
حضرته المنطقه مسجلها بأسمه
كعدت ببابهم كَلوله غلطان ..
وكَع مني دمع دنكَت المه
ولو طالع مْسَلّم ما احاجي
بس بكَلبي اكَول الله يسلمه
تتوقعون اريد اتصالح وياه ؟؟؟
بشرفكم تالي عمري اكسرلي كلمة ؟
اشايف روحه اتنازل واراضيه ؟
اذا راضيته اكَلكم وين اعزمة !! ^_^
انه الخوش زلمه وما اطخ راس
لكن بالعشكَـ مو خوش زلمة ^_*
للشاعر يحيى العلاق
