شما اكتب قصايد نابعه من الروح
وبعد بيه وجع بالشعر ما مكيول
وحك كل دمعه سمره مرافكه الجناز
ووحك كاع النجف من تشتهي المكتول
انه ملبس دموعي بتوت للمعدان
وحسراتي نثايه ولابسات حجول
شما كول المصايب كبرن اعلى البال
ارد واصفن عليهن بعد بيهن طول
انه جنازه شعر بشفايف الخرسان
وانه شوغة هزيمه بطارف المشلول
يموت البس تصد للعنده سبع اطفال
خايف ما تصدلي وخاف عمري يطول
اشتهيت اشتم عرك من كصة الدفان
ونويت انشد نعش فوك الجتف محمول
طلكت الكصيبه التنظفر بالطين
ومشيت انحر الصحره واظفر العاكول
يشتمني الحزن لو روحي اضمها بطيف
فلاح ويشم عطاب بالمحصول
احب ابجي بستر بس المصيبه شلون
انه همومي غجر والدمع دك طبول
تره الضحكه الغميجه تريد راحة بال
ميجودر ضحك بشفايف المذلول
عفت شهكة اللهفه بختلة العرسان
وطلعت اتمشه شهكه بريةالمذلول
انه شايل وجه ميلوك للبطران
ويكعد للثكاله فصال عرض وطول
يالماشي اعلى كبرك اخذ عمري وياك
تره بذمتك شبابي العشته ظل مشكول
ظل واكف بعيد وكلي موتك ذاك
واكلهم اني جيت وانته ما مسؤول
الشاعر ادهم المجرم
