أمس طاحت الوردات
بحضن الشمس
والتمت عليها الناس..
كالولها شهل العرس
استحت الشميسة ،
ونده بخجل عصرها
لفت ظبة سيسبان بخصرها
ومن فرحها ورقصت ابمستحة
ونست ابروحها
وتضوي على الناس وهي شمس
والبارحة كلشي بروحي اشتهاك
ياطعم حلاوة خوز 1
وشعر البنات 2
شوصفك وهي الوادم منك
تاخذ وصفها
يالف عطر ممزوج ابوكاحه
واحتارت الجلمات عالشفتي
وكلت ماني واصفها
ظلت الشميس تتختل ورا ظلها
وصار الحسن ناطرها
سمرة والترافة عود من عدها
كالولي تصبغ اظافرها
كلت صبغ التوت مطبوع بصابعها
كالوا تحط حنة بضفيرتها
كلت عمية اعيونكم
وكلشي ما يعرف الشافها
كالوا تلبس كعب عالي
كلت من الريحان طبايعها
كالو راء ماتلفظ
كلت يامحله غنجه علي ودلعها
كالو تحبها
كلت تحبني هي سئلوها
كالو اشتحب منها
كلت سمار البصرة
وطيب العشار
ولمت الناس عالشطها
كالو اصغيرة
كلت جبيرة ابعيني واكبرها
كالو حجت وياك
كلت يكفيني كتبت اسمي بصدرها
كالوا اشافت منك
كلت اواكح دهر
واصبر على الفات
واتمنه ارد الها
وهي تدريني حيل انا احبها
كالو هم تتلاكة وياها
كلت ليلية ويه الشمس اساهرها
كالو وشكلت عنها
كلت محبوبة بطبايعها
وشحجت عنك
كالت انه مدفون بمفاتنها
من طاحت بحضن الشمس
ظلن اخيوط الشمس تتباهه بحسنها
كالوا تحبها
كلت انه المدفون بمفاتنها
1= حلاوة خوز.. هذه حلاوة تعمل في منطقة ابي الخصيب في البصرة اطعم مايكون اسمها (حلاوة نهر خوز )
2= شعر بنات.. في المناطق الشعبية يكثر الباعة المتجولين وهناك حلويات حقيقة لا اعرف كيف اصفها اليكم هي شئ من السكاكر حلوى تسمى شعر بنات
عقيل العراقي
