ما اگولن احبّك آنه ميّت بيك

[حارث الاماني]

لأن هذا الورد منّك اخذ عطره
لأن بيك الگلب متعلّگ و مجنون
لأن گلبي يدگ من اسمك يمرّه
لأن عشگي إلك مو عشگ ليله و يوم
الله الخلق حبك بيّه بالفطرة
بگليبي ولدت و كبرت و حلويت
بگليبي زرعتك من چنت بذره
سگيتك عاطفة و حب و دلال هواي
تانيتك تخظّر و اصبحت ثمرة
يا أجمل أثماري و يا حصاد العين
من طيفك يمرني الگلب شيصبره
ياخذني عله بيتك گلبي يا محبوب

و آنه ارگد و اغلّس و اخظع لأمره
أعاين عله ابّيتك و احظن الشباچ
أتاني الصبح يطلع و أبقى انتظره
هلبت نظره منك تجبر المكسور
هلبت تنجلي الآهات و ألحسره
هلبت بوسه من خدودك الترفات
تهيد برجفة الدلّال و أتخدره
يا حلو الملامح يا ترف يا زين
يابو خدود الگماري الدوم متنورة
يا أجمل قصيدة و يا شعر منظوم
و يا أجمل رواية عشگ بيهه اقره
يا تاج الحِسن و انت أجمل الحلوين
يا شمس الظهاري و بالمسا گمره
يا دجلة بشفافك .. شفّتي مشحوف
خلّي بدجلتك مشحوفي اله ذكره
دخل أمواج دجلة تحرك المشحوف
خلّه بدجلتك يغرگ .. دخل يبره
دخلي سنين عمري تخضّر بملگاك
خل يفرح گليبي ألما فرح عمره
ما احچي و اوصّف طولك المهيوب
و لا اوصّف ألشامه البلحنچ خطره
و لا اگولن خدودك چنهه تفاحات
بس اسألهه أمك هيه بيك أدره
أمك لمه طلگت بيك صرخت حيل
ما صرخت وجع لكنهه مبتشره
تعديت بجمالك حسن (ابن يعگوب)
و ما أظن آنه (يوسف) يوصل لعُشره
جمالك داهية و يشحن شحن بالروح
جمالك ظيم خلّه الوادم بحسره
جمالك مو طبيعي .. و ما اگول أهواك
آنه اعشگ تراب جدامك ألسمره
آنه اعشگ الگاع ألشالتك يهواي
و اسكر بالدرب لجدامك تمرّه
آنه اعشگ جمالك ضحكتك ممشاك
و اعشگ بيتك و شباچك و عطره
آنه اعشگ عذابك قسوتك و جفاك
و احبك لو صرت جوه الضلع جمره
احبك و اشتعل من راسي للرجلين
و صابيعي شمع اعلگلك العشرة
احبك و اليحب مجبور يتعناك
ويضل وياك اخر يوم بعمره

 

[فاضل البصراوي]

رد: ما اگولن احبّك آنه ميّت بيك

عاشت الايادي ع الطرح

 

[محمد المقاول]

رد: ما اگولن احبّك آنه ميّت بيك

رووعه القصيده جدا
عاشت الايادي يا ورد
تحياتي لك يا طيب

 

[نجم المياحي]

رد: ما اگولن احبّك آنه ميّت بيك

الله حلو
عاشت ايدك وردة
نورت

 

[المشتاق]

رد: ما اگولن احبّك آنه ميّت بيك

بسم الله الرحمن الرحيم

أخي الكريم حآرث الامآني
سلمت يدآك للوحة الجميلة والرآئعة
{{{ ما أگولن أحبك آنه ميت بيك }}}
دآم لنا فيض العطآء
وللمزيد منَ كل جديد
تحيآتي ودعآئي
دمت موفق
مع بآقة ورد
[URL="http://decoration.files.wordpress.com/2008/04/f-jj08b_e_d28a5fb0168e4316ef0bae1aa3444c23.jpg?w=343&h=512"][URL="http://decoration.files.wordpress.com/2008/04/f-jj08b_e_d28a5fb0168e4316ef0bae1aa3444c23.jpg?w=343&h=512"][URL="http://decoration.files.wordpress.com/2008/04/f-jj08b_e_d28a5fb0168e4316ef0bae1aa3444c23.jpg?w=343&h=512"][/URL][/URL][/URL]



​