المرحوم الشاعر :غازي ثجيل ولد في الكوت 1942 واعدم سنة 1987مسافرين .. وعيني مشدودة لدربكم
رايحين .. وآه لو عندي گلبكم
چنت ألم جروحي كلها
ويا جرح يلچمني بيكم
حيل الچمة والله الچمة
مسافرين .. وروحي يطويها الدرب غربة وملامة
رايحين .. ومن بعدكم صرنه لشطوط العشگ والحب علامة
واحنه طرزنه الستاير للشبابيچ العبر منها الضوه
واحنه علمنه الخلگ طبع الوفه بدرب الهوه
شوگنه جناحين للراحوا بلا چلمة وداع وضيعونه
مسافرين .. وتغفه بعيوني المحطات وصورها
مسافرين .. وترفة ياعين المواعيد صبرها
رايحين .. وذبلت جفون التعب بيها سهرها
عيونهم عشگ الربيع
الغض على الدنيا حلاته بروح ترفه
رموشهم ليل الطويل
اليشرب عيون الضوه وباهدابه تغفه
وروحي مثل الگاع لو مرها المطر
تمطر وفه وخير ومحبة
لچن الدنيا سفر
والنحبهم ما نسيناهم نسونا وسافروا
-------------------------------------------
(ضيعوني)
سلمت روحي وياچ ياشمس الغروب
والما تشوفه العين تسلاه الــگــلـوب
وانه ذاك العاشت عيونه بصورهم
وبمكاتيب العشگ ينضح صبرهم
ياسحرهم .. ليش من بعدوا نسوني
ضيعوني .. وضاعت بشوگي الدروب
ضيعوني وانه لسه گليبي يسگيهم حنينه
عيــــــني هم شــلون واحد ينــسه عـينه
عمــــــري هم وكـــبرت بفــيهم ســنينه
وحتى شـــوگــي يطـگ ورد ومأملينه
واحنــه يــــاشـــوگ شـــبـدينـه
السكته تاخذنه وطواريهم تجينه
ضيعوني.. وضاعت ايامي على دروب البريد
وانشد النسمه التسافر غيــر شوفتهم شريد
ولو نسيت وردت احبن، هم احبكم من جديد
أي يا گــلبــي من الــعـشــگ والشوگ زيد
وتــدري شوفتهم مــحبـــة وفـــرح عيد
-------------------------------------------
أرويك وشحيح الماي***
وتفيض وتشب وتفوح
وأنه گلبي هرش ناحل***
بسچين العطش مذبوح
چا هلبت نده نديت***
من گامت إديك تلوح
تعبانه ولو لساع***
شگبان العتب مطروح
أسامحلك حچايا هواي
وأغفرلك حچايا هواي
من غير التجي وتروح
كلها ومن يجيسك ظيم***
اسگفلك بواري الروح
دشوف المرز متنه يطيح***
من يشرب إبميه اللوح
ولوما حرگة الخزرات***
ماصار الدمع مفضوح
ولوما الجرف والطوفان***
ما سارت سفينة نوح
-------------------------------------------
ياضوه ولاياتنه شعندك خبر .. سيرت نجماتنه وهل الگـمر
احنــه ما هــمـنه الــوكــــت .. احـنــه تــعــبــــنـه الــدهـــر
ياضوه ولاياتنه الدنيا زهت .. والسنابل من محبتنه روت
ناغت الگــاع بـفرح ليــلة عـــرس .. وين ما مالت على خيوط الشمس
والهوى بكل خصــر من عدها انــتشـر
احنه ماهمنه الوكت احنه تعبنه الدهر
ياضوه ولاياتنه الليـــل انگــضــه .. جانه صبح الخير بالحب والرضه
احنه طشرنه المحبه بكل كتر .. والهـوى بساتين والدنيا عطــر
للغفــو على شـــوگ بضــفاف النــهـــر
احنه ماهمنه الوكت احنه تعبنه الدهر
-------------------------------------------
الليلة الگمر معزوم .. عونه التهنه وياه
ياگلبي ليش تلوم .. تدري حلو نهواه
طوّل يا ليل السهر .. كيف وضوه وقدّاح
ساعة ونضيّف الگمر .. ويرد هوانه الراح
ونغني لحن الهنه
انت وگمرنا وأنه
كل لحظة تسوه سنة .. انت وانه
ترد للعمر معناه .. الليلة الگمر معزوم
نوّر يا ليل السهر .. نشرة ضوانه نجوم
تسهر صواني المهر .. وأكثر شمعها يدوم
شوگ ومسرّة وهمس
ليلتنا أحلى من أمس
كل لحظة تسوه سنة .. انت وأنه
ترد للعمر معناه .. الليلة الگمر المعزوم
-------------------------------------------
حلوين ويدرون نحبهم .. والشوگ ويانه معذبهم
لكن للحب يكتمون
يخافون الناس يگولون
الحب لذوبنا مذوبهم .. مايدرون
حلوين وجرفين العين تسافر بينه
وشراعين الشوگ تغرب وتلاگينه
حلوين وشمسين الحب تشع علينه
وهلالين الحاجب دنيا تحچي شبينه
نحبهم ويحبونه .. وعالحب معلمينه
لو كل العذال انجمعوا شينسينه
