كالو أنسه
ولم كل ذكرياتك
واطويهن بجلاد وكتب
احنه لمينه كل الفات
وادفنها بليل اخرس
وفضنه العتب
انه رايد أنسه
وأرد مثل اول
أغفة بفي العنب
ويطربني داخل من يغني
وتنام العين بلايه تعب
بس ظلت سالوفة
بطرف روحي يسمر
ليش ماكلت جنت وياك العب
مشن أبنيات الطرف عله جرحي
وحدتهن تغازرني
والثانية بلسانها تصلب
كالو يا وسافه اخسرت عمرك
وكل الحسافة تاه فكرك
وأنت أنت الجنت دوم تغلب
أفركت راحاي والك ادير عيني
وصحت لا ولك
خليتني بحلوكهم ملعب
***
رصيت قلبي بوكاحة ليل
وشلت طارف اعيوني فوك
كلش فوك
ولكيتك ويه النجم تسهر
ياصلافة أعيونك وطبعك
بطيب خاطر اجيتك
ولكيتك بأزغر اسيهل مغتر
خايب روحي شميسة ودفو
وقلبي طيب ذات
ويامة عله النذل اصبر
بس وياك أنسيت روحي
وكلت ما يسويها وينسه
بس طبعك طبع ذيب يغدر
شكثر رقصن اجفوفي بخصرك
وشكثر نامن اشفافي بشفافك
ولساع طعمهن بشفافي شكر
جنت احضنك اتكلي احضن
وشابكك بكل ذرعاني
وتكلي كون الفجر ما يطر
واهس طير نشوان بين البساتين
روحنه نلم اللوز والرمان
ومانثبت كل شوي بغصن انوكر
تاليها اتكلي انسه..؟
وأنسه الراح بكل البيه
واكتب من اول سطر..
15/08/2013
العـ عقيل ـراقي
