وهج طفله وصحت عالشيب

[فقار الكرخي]

وهج طفله وصحت عالشيب
ماتندل تراجي الطف!!
وهج جانت قصيده ومشرعه وخيمه
ونوايا ودم زلم ماجف!!
تدنى الليل وانباكت كلايدها
الصدگ مادرت (بسم الله )
حرز جذاب عند الباك جرغدها!!
الشعب يقرى بگصايبها شكثرتاريخ
مرسوم ابتعب شيله!!
على كاروك اليدورون
لولت بالبواجي ادموع تفعيله!!
لگيناها كناطر عابره من الغيم
تتهجد مطر عطشان
صاغو منحره لكل سيف
متبدي بتواسيله!!
وهج طفله عراقيه
زغيره
بطول عمرآدم!!
حزن يشبه وجه خبزه
جوتها شفايف الحرمان
حريّه وسجن وسياط
ماتستغفر بنادم!!
المناير زغرت وكبرت سوالفها
المحاريب وصلاة الليل متوضيه شفايفها!!
حرامات الانسان ايموت وانشيّعه!!
حرامات الدرب من يعثر انضيّعه!!
وهج طوفي اعله كل ديره!!
بعيونج رسايل خوف لوحيره!!
الشعب جوعان حاجيهم على الغيره!!
غسلي شكد سنابل جاسهن جف ليل
وانباع الخبز سكته
برخص صفنة طفل ميلاده يم جامع!!
الشعب مدري الوطن ضايع!!
تغربنه وي كل حفلة عشك وجنازة موادع!!
وهج صيري شعب موطفله شعبيه!!
لكينه بمصحف الثورات
شيباتج عراقيه!!
سبوج ورادو تفرعين بس الستر عالنيّه!!
سمارج بي تعب فلاح وعيونج مضايف ركضت اعله الطيف
جي عطشت سواجيّه!!
الحداثه البيج ماتقراها الحديثات البگدج!!
الوحي يباريج
بس وين النبي المن خاطره يعبدج!!
الدخلو دينج يعرفون
شامات الضوه بخدج!!
خذوج ومن جديد نريد
للدنيا هوى نردّج!!
وهج ماكو سما بگدج!!



وسام سباهي

 

[المشتاق]

رد: وهج طفله وصحت عالشيب

أخي المبدع فقآر الكرخي

سلمت يدآك لهذه اللوحة الرآئعة
والقلآدة الجميلة
ذآت الإطآر السآحر
{{ وهج طفله وصحت عالشيب }}
إختيآر موفق
دآم لنا فيض العطآء
وللمزيد مِن الإبدآع والفن
تحيآتي الأخوية
مع بآقة ورد
​

 

[آهاات حالمة]

رد: وهج طفله وصحت عالشيب

نشرت من العبق ما يكفي لتملأ الارجاء
دام طرحك مزهر بفيض إبداع
تحيتي لك والتقدير
​

 

[فقار الكرخي]

رد: وهج طفله وصحت عالشيب

نورتو الموضوع .