أنشر مايعجبك من اشعار ✾ دارميات ✾ ومضات ✾ ابوذيات ✾ قفشات ✾ زهيريات ✾

[mohammed.shams]

صدك هينوب ناسينه؟؟؟
صدك معبر سوالفكم صعد فوك الظهر طينه؟؟؟
يبايعنه ابضحج ساعات...وانت سنين شارينه....
عليمن بعد تاذينه...؟؟؟
عليمن يالكلت والكال...تاخذنه وتودينه...؟؟؟
عليمن تشتكي امن الشوك....واحنه الشوك ماذينه...؟؟؟
وعطاشة وغير عينك ذيج ما اظن عين ترضينه...
بعد بالك تمر بينه...
رمينه ابسلة النسيان...شوك المايوافينه...
بعد بالك تجر حسرات...لو مرَ بيك طارينه...
صحينه وهز كلبنه الضيم...واسمك جان عامينه...
طوينه ايام ماضينه....
نسينه شلون جنه ابشوك...نفرح لو تلاكينه...
نسيتك يالهويت الغير...وابظهرك تخلينه...
بعد هم تعتب اعلينه...؟؟؟؟
بعد لو هم شفتني اتكول: ذمَة اتريد تبرينه...؟؟؟؟
غسلنه اجفونَه امن اضواك...والعذال بالينه...
حجيهم ذوَب الدلال...لكطة اتكول لاكينه....
كفاية وعجز منَه الشوك....وانه وياك ملينَه...
تندمنه ورجعنه انلوم...بعد الهجر جاوينه...
واظل اشتل بعد نخلات ...واحجي شما ردت بينَه...
يناسينّه....


عريان السيد خلف

 

[mohammed.shams]

اون ما يوم گتلي تون مالك
اخذ قلبي حلالك صار مالك طلت يا ليل يمكن فجر مالك
وطالت غيبه احبابي عليه

 

[mohammed.shams]

روحي بيده....وساهرت عيني الليالي...
اتأملت تلمح خياله....
اخدود لو ورد البراري..؟؟؟
اخدوده تحمرّ ابدلاله....
وانه صابر ...وانه ذابل...
وانتظر جلمة فرح منّه ابرسالة...
وشعجب شحّن مكاتيبه عليّه...
وما بعد للحب أثر ...؟؟؟
والكلب آه الكلب...شتلة ابجزيرة...
وتحلم ابمزنة مطر...
ابهيده يا شوك العمر.... مابيّه غربة...
شويّه من امحبتك...من شفتك جلمة اريحية....
بالحلم لو ليله بس تخطر عليّه....
اشهالمحبة ...؟؟؟؟...اشما أريد أترك ودادك يصحه بيّه....؟؟؟؟
استاحشت عيني وصبرتهه...
إتنطري يا عيني جيّه...
جيّه لو حتى ابحلم....وابوحشتي اتسيّر عليّه...
آخ لو شوكك يجيبك...؟؟؟
مرّه خل يغفه ...اويه جلماتك حبيبك...

عريان السيد خلف

 

[mohammed.shams]

يُحكى ..
أن هماً غسلته دمعة ....
وقلباً أحيته سجدة ...
وحُلماً حققته عزمة ...
وذنباًمسحته توبة ....
وأجرًا ساقته تمرة....
وعسرا يسرته دعوة ...
للحياة مع الله مذاقٌاً آخر ..

 

[mohammed.shams]

لاتتمنه …ياكلبي لاتتمنه
ماطول جافانه الهوى وبطلنه
وك لاعين ظلت خاليه
ولاظل ولف يتعنه
وك لاتدك …يالدكك قهر
مقفول باب الجنه
اوهينوب …مامش ظنه …
اه ياوكتنه الماصفت نيته وزرك عيننه

 

[mohammed.shams]

وطحنه ابوسط سلوة هفه ...
… وكل ذيب يبرد سنه

ردنه نكف ونهوش نحمي الروح ماهمجنه
وانت بجلادة عين …صحت اكلنه !!
وماطول راضي ابموتنه استاطنه…
اه ياخسارت نوحنة
ويارخص ذيج الونه
ردفن علينه اسهامكم
وعلى الصبر دامنه
لااحنه للدنيه صفينه
ولاهوى الدنيه النه
متبدل ابطبعه الوكت ؟؟؟
لو احنه الأتبدلنه ؟؟؟
اه ياهواكم ؟..بآول ايامنه اشكثر دللنه
ومن وصل طينتهه الظهر
كلهه تبرت منه ؟؟؟
لاسالفه بشفه محب
لاعاذل اليعذلنه ؟؟؟
وحشدت دنيانه اوصفت
جنهه ابد موش النه ؟؟؟

عريان السيد خلف

 

[mohammed.shams]

عودتني ..
انتظر ..
وارسم على الأيام .. موعد
عودتني،
العيد يعني الناس ..
وُويَاهم أعيّد
گتلي .. مِنْ يعتگ جرح ..
جرحين .. يتلاگه وجعها
وعودتني.
عودتني السفن ..
من تِصفح اگبال الريح ..
تتمزگ شرعها
كتلي:
ما تبکه سفن ..
والناس
ايعيروها: خشب عادي
ويغرکها دمعها
کتلي يا سفّان ..
من ضلع السفينه ينكسر ..
كل ضلع من عِدنه ..
ضلعها
رِدْتْ اگلّك ..
وانتهينه .. وفارگتني
رِدْت اکلّك .. عودتني.
‘‘
عودتني ..
اترك ابيتك بطاقة عيد وموعد
واكتب ابابك اذا مسافر .. چلِمْتين.
ولگیتك سافرت .. (……….)
وعودتني. ” ..

مظفر النواب

 

[mohammed.shams]

لا حنيت ولا ونيت
ولا طارش چذب وديت
ولك مر بحلم مرة
واحسبها الك جية
واگولن جيت..

 

[mohammed.shams]

أواكح ..
چنّي . إيد تفوج ..
ومگطوعه أصابعها ..
أشوغ ويه الشمس .. ليفوگ ..
أعاتب گاع ..
مدفون بنباعيها ..
مكتوب ابّلاويها ..
اتحفر بيّه مساحيها ..
وأشمس روحي بالسنبل ..
يجي بروجة شمس ..
يسگي السفن والناس
يسگيها ..
ابوس ايد اللي يسكي الناس ..
ويحمّل تمر ، وسلاح ، ورصاص ..
بشرايعها ..
أبوس إيد اليشيل البرنو الزبنيه ..
بطرگ ثوبه ..
وأبايعها ..
أفه يا گاعنه ؛ الوكحه !! ..
حلاة الليل ، وأهل الليل ..
والنار ..
بمرابعها ..
أفه يا گاعنه ..
السحگتها ..
وانسحگت عليها ..
جيوش يابو جيوش ..
وما بدلت .. طبايعها ..
أفه يا گاع ..
ينبت بيچ للواوي عنب ..
يا طيبه ..
ويعرّس عليچ الذيب !!!..
أمد صبري اعله صبرچ وأحفر سراديب ..
لو صرتي ..
زبل من زود المزبلين ..
لو داروا عليچ سيان طينتهم ..
يحلوه
سنين ..
أگولن گاعي واعرفها ..
أگولن گاعي ..
يتنفّس بريتي ترابها ..
وحبها .. وبصلها .. والشمس .. والطين ..
باعوني عليها ..
وخضّرت عيني بدمعها ..
وماني بايعها ..
وحگ الشطر الأحمر ..
والليالي الغبره ..
يگويعه ..
أموتن وانت حدر العين
تتونسين ..
أفه يا رجال طين عراگنه الطيبين ..
تنسون المراجل !!!
والمراجل بيكم اتسمّت مراجل ..
كلفه يمعودين ..
أگّل للروح تنسيهم ؟؟..
تدنّج راسها
وتسكت ..
حليب البيها ، مانعها ..
كل روح ومراضعها ..
كل إيد وأصابعها …
كل روح وجرحها ،
الجرح ما ينلام ..
يا معودين أهلنه ..
يلحچيكم يالنشامه ..
حزام ..
يا معودين أهلنه ..
الگاع ضيجه من عگبكم ..
ما تسع حچام ..
تنام العين ، چي تعبانه منّي
ومن نفسها
تنام ..
ولك ردّوا …
حنيني ايگعد الميّت ..
وحشتي اتطلّع بليل الشته ..
شمس الربيع ..
أيّام ..
عين الما تشوف أحبابها الحلوين ..
ما هي عين ..
ولا هي تشوف ..
ولا هي بعمه ..
ولا هي تنام ..



النواب

 

[mohammed.shams]

طبع دنيا الاسود تصيد عز الصيد
تاكل مزته وتترك يسير النيل
واني طبعي
من اصاحب صاحب المضنوك
لا أبجي بشديده ولا يرك الحيل
لا يضل خاطره ولا اوسخ الماعون
ولا ادفى بمنامه شما يجور الليل
وما مش ناس
وحدك ذبل ليلك بالثلج والكاس
وحدك تنطفي ويصعد عذابك زيت
وتخضر عتابه من الجدم للراس
ومن شباش حسنك لو تعديت
واضيف تراب جدمك وردة البيت
اسئلك لو طفح حسنك بالعيون
حلو بطبعك يالغنج لو تحليت
والمك لمة الخاطر بالعتاب
وانشدك من عطشتك ليش ما جيت
ونده روحي النسيم وليك حنيت
ومثل كطرة ندى بوردك تبديت
تمنيتك تجي بكد ما تمنيت
حتى انشدك من عطشتك ليش ما جيت
ولك يا كلبي حلك تنور لو سرداب
صوغني من ليلكم نجمه تبات وياي
ومن تشبع سهر ويجيسها الوهواس
اطفيها بصبح والغبشه رشكة ماي
واشعلني ولع د شعلني ولع
يدوي العطش بالعود
حتى انزع جلد روحي وارد لصباي
ارد لصباي أمني الفرح
و باسمك ورد عالباب
فاحة ريحته ولانك بعد ما جاي
من يا صوت اصيحك والصدى يجاريك
واكلك مااكدرت يل تكدر بلياي
تراني ما اكدرت يل تكدر بلياي

عريان السيد خلف