أنشر مايعجبك من اشعار ✾ دارميات ✾ ومضات ✾ ابوذيات ✾ قفشات ✾ زهيريات ✾

[mohammed.shams]

من عندي كل الصوچ مو صوچ اهلهه ..
بالعرس ماحطيت چيله برجلهه ..

 

[mohammed.shams]

انه كبلج جنت ترس عيوني انام
وعالعشك قدمت لا النافية..!

 

[mohammed.shams]

غير أقتنع كلشي إنتهى!
وألزم حدودي وأعتزل طاريهه!
غير أترك ال..بلكت تجي !
وحلك بحلك سالفتي عود أحجيهه!
غير أكطع الظنه بعد !
الراحت ،، إبالي شكو مخليهه؟؟
راح اقتنع كلشي انتهى
وين الله أفز من الصبح ناسيهه....

 

[mohammed.shams]

ياما اجيك بشوك وتردني كأيب
وخاطري تكسره ولا تكول ‫‏اجبره‬
كل امنياتي اصبح لاهلك نسيب
كل البنات ارجال بس انتي ‫‏مره‬

 

[mohammed.shams]

ركدن وصارن بيض هذنيج الوساع
وتسرسحن بجفاك من وجهي للكاع

 

[mohammed.shams]

راح وكســر خاطري ولملم طيوفه وشال
ونهــر المحبـه نشف ظلت جروفه وشال
الزمــن ماعافنـي رد عالـكفوف وشـل
ماعفت حبــك انا كلبـي على حبـك ظل
عالهجر شو تعتنـي عالوصــل دومك ظل
بجتافي اغطي الشمس بالصيف اصيرن ظل
لو مر عليك الشتا لفني على صدرك شال

 

[mohammed.shams]

سألوا تعرف الفرح لا جاوبت معرفه
وسالوا تعرف الحزن اى جاوبت معرفه
من حيث شاعر صرت وادري الشعر معرفه
ومختص فقط بالحزن غير الحزن مكتبه
واسبابه عندي جرح ما سد ابد مكتبه
وشكبان منه الألم يمكن واظن مكتبه
وديوان دمعي انطبع دار النشر معرفه

 

[mohammed.shams]

ياصاح دون الخلك كلبي الك فاتحة
والكلب ينخة الحلك بالحب الك فاتحة
اي والذي نزلج ام السور فاتحة
مابين ضلع وصدر حبك حبيبي لطم
وحجي العوذل ترة يضربني صاير لطم
لو غبت عني ترة ابيتي يصبح لطم
ويصير كل العمر بعدك ترة فاتحة

 

[mohammed.shams]

يازين طعم العسل مخزون في شفتك
وروحي عليه ترد لو لولحت شفتك
شفتي تعاسه واسه وصار الفرح شفتك
وكل ما اخلص حزن حزني عليه يعيد
والجان ماصدكت هاك الجروح وعد
صايم ولا افطرت من مر عليه العيد
اشلون اعيد وانته اهلال ماشفتك

 

[وهج الحروف🔥]

هاي اكو ام دار بيها الوكت فكعدت عند ابنها
وره شهرين ابنها حاجاها بطريقة الدارمي قائلا
-----------
الابن
ارد احجي يمه اوياج بس لا تزعلين
من باجر انوديج دار المسنين

الام
يحبيب اشسويت مني اشبدر كول
بيت ابني رحمه اجبير ميلمني معقول!!

الابن
اي يمه مرتي اتكول تعبتني امك
صارلها بالشهرين موجوده يمك

الام
مرتك ييمه اتكول شعتب عليها
اعتب عليك اشلون ترضى ابحجيها

الابن
لا يمه مرتي اهواي تعبت خطيه
وسالفتج اشما شوف كلش بطيه

الام
يوليدي من شهرين تشكي او تعاني
وابطني تسع اشهور شايلتك اني

الابن
ما اكطع انه اوياج هم راح امر بيج
صدكيني يمه اهواي اريح الج هيج

الام
باجر بعيد اهواي وديني هسه
وبالك تمرني ابيوم وديني وانسه

(وختمت حديثها قائله )

امشينه بس يفلان خليني اوصيك
البيه مر اليوم باجر يمر بيك.


قال تعالى :
ولا تقل لهما افٍ ولا تنهرهما وقل لهما قولأ كريما واخفض لهما جناح الذل من الرحمة وقل ربي ارحمهما كما ربياني صغيرا.