رد: أنشر مايعجبك من اشعار ✾ دارميات ✾ ومضات ✾ ابوذيات ✾ قفشات ✾ زهيريات ✾
عمر ابن سعد مخاطباً قادة الجيوش
بله گولوا شرايكم البس حجاب
الطف صغير وانلزم من انهزم
:لا زين شاربك وانوب فوت
تدري بالعباس يعارك بس زلم
ياعمر يبن سعد عباس هاذ
چانت امه تصيحله وليدي الشهم
شهد السيف ودحلفه بذو الفقار
يگلك العباس شبعني ثلم
بليل من يغتاض ما ادري شيصير
من يخوزر عالسما تمطر نجم
مدري چانت ياحرب والدنيا ليل
وحطب ماكو والبرد ماينلزم
وصار جيش الله سعفة وطگاها ريح
وگام ابو فاضل يچيم بالزلم
بورقه ارسم زينب وچتفها حيل
وعطش مر وحرك مابين الخيم
گبل لا تكمل اللوحة بشي قليل
يطلع العباس ويشگ الرسم
حسين نعمة وخبز حنطه وفي ثخين
فتش گلوب العشك تلگاه وشم
شوف اي مجروح ومعادي الحسين
تذكر العباس يمه ينلچم
وشوف اي مجروح ويحب الحسين
تذكر العباس يمه يبتسم
شوفه من يوگفلك اباب الخيم
ماتعرفه ابو فاضل لو علم
چان ابوي يگلي اذا بالشط تطيح
حشم العباس يفزعلك بلم
من يهد تلگه الزلم يتطافرون
حته هذا الهوا يشرد لو هجم
غلب حاتم بالهلا وحي الضيوف
من كثر ما شافوا بقمصانه دم
هيه مو شغلة ندارة وچف طويل
الجرح مامهيوب اذا مابي الم
ولد حيدر بالهلا يشبعون جيل
الماله رس من الكرم ما يحترم
افرض الله ما خلق واحد چفيل
ولا خلق زلمة يفش بيده الورم
شنهي معناها الرسالة بلا چفيل
يخبل الطف بس يضل ناقص طعم
.............
للشاعر علي المنصوري
