أنشر مايعجبك من اشعار ✾ دارميات ✾ ومضات ✾ ابوذيات ✾ قفشات ✾ زهيريات ✾

[mohammed.shams]

جيبلي صايغ مثلهم ،
جيب مصيوغه مثلها!

جيب بيبان ..
بطعم بيبانها التلگاها كلها...
مرصّعه بغيم ..، ومسافات ..، ومواسم ....

باب ...
لونه غياب

باب ..
بلايه لون

وباب شذري ..
بنص فتحته لكل شمس تومي التراجي

وباب .....
مقفول ومفاتيحه رذاذه ..،
و في حلم كلش غميج
ونخل مايشبه نخل


_معتز سامي

 

[mohammed.shams]

كاسين الجذب
والكاس دين اسود وانه بلا دين
ولك بهداي
اخذني من الحزن والليل
ولك بهداي
احبك يافجر ناسي
وعطش كاسي
وتعب مثل الله مايكضي


_عزيز عسكر

 

[mohammed.shams]

خليك بفرح وبجرحي خليني
طبع عاگول
ما متعود اعلـ الناس تسگيني
وهذاك انت
مثل عارف عرب للداي
تندل وين تجويني
وتعرف ادموعي يمته تطيح
چي حطيتك بعيني .


_عمار سالم

 

[mohammed.shams]

اهي غلطه وعفت بين التراب اعيون
ماحسبت ريحك من تهب يعمن


_حسن حاشوش

 

[mohammed.shams]

1. بــ'هيدة نتناكث تعب ..
   عتبة مسكونة الاحلام ..
   'وخوفنا أُوية الدم لَعَب ..
   
   بــ'يـا صبح متريد نزهگـ ..
   إحنا بيبان إنتراكض ..
   ما لگينا إچفوف تندگـ ..
   
   
   _احمد عزيز السماوي

   
   
   
   

 

[mohammed.shams]

كون لا فاتح رساله
ولا قريت بيوم ضرفك
كون ارد ذاك الغريب الما يعرفك

_حسين كريم

 

[mohammed.shams]

وجهك
لمّ خطوته وشال من عيني
ولّهسّه
كلما أكبر لملگاه ، يصغرلي
وظلّ إسمك
إسمك ما گطع بيه
إسمك يندل بيا تايهة يمرلي.


_زيد الهاجري

 

[mohammed.shams]

ياحبيبي
عاندت گلبي ونسيتك
بس نسيتك جوّة گلبي


_عباس الغالبي

 

[mohammed.shams]

تخيّل خايف ، و أدعي الطريق يطول !!!


_شجاع الحليحل

 

[mohammed.shams]

هاي اكو ام دار بيها الوكت فكعدت عند ابنها
وره شهرين ابنها حاجاها بطريقة الدارمي قائلا
-----------
الابن

ارد احجي يمه اوياج بس لا تزعلين
من باجر انوديج دار المسنين

الام
يحبيب اشسويت مني اشبذر گول
بيت ابني رحمه اجبير ميلمني معقول

الابن

اي يمه مرتي ادگول تعبتني امك
صارلها بالشهرين موجوده يمك

الام
مرتك ييمه ادگول شعتب عليها
اعتب عليك اشلون ترضى ابحجيها

الابن

لا يمه مرتي اهواي تعبت خطيه
وسالفتج اشما شوف كلش بطيه

الام

يوليدي من شهرين تشكي او تعاني
وابطني تسع اشهور شايلتك اني

الابن

ما اگطع انه اوياج هم راح امر بيج
صدكيني يمه اهواي اريح الج هيج

الام

باجر بعيد اهواي وديني هسه
وبالك تمرني ابيوم وديني وانسه

(وختمت حديثها قائله )

امشينه بس يفلان خليني اوصيك
البيه مر اليوم باجر يمر بيك


راقت لي جدا