أهديلك ألم خرسان!_حسين الساعدي

[آهات حالمه]

شهديلك ابهذا العيد!!!
لجمة ابروحي
لو دمعه!
لو شوك الخميس الراح
الشيب/ ليلة الجمعه!
.
أهديلك / كلب مغثوث
مايعجبني كل طبعه,
من ايشوف
زفه اتفوت*
حتى الشارع / ايكطعه!
.
لو أهديلك الحسبات
تطلع كلها/// متفرعه
.
بالجادر يصيحن صوت
راح وما اله/ رجعه!
.
بيه اتزاحمن ///وجعات
وجعه/ اتفزع / ابوجعه!
.
زرعن,, بالكلب ونات
بين اجروحي /// متوزعه,,
.
وليل الينتهي ///بحسرات
بعد ما تنتهي / الشمعه!
,,
شهديلك
ابهذا العيد!
سولف/ واطلب ابسرعه!
,
اهديلك جرح/ مذبوح
طاح/ وما لحك ربعه
لو يلزك
ابنص الروح
فنه اليكدر/ ايشلعه!
,
أهديلك
ألم خرسان
أخرس / حاير ابوضعه
غركان /
ويصيح ابصوت
والأخرس محد ايسمعه!!
.
ضل يتلاوه ويه الموت
عود امناطر/ الفزعه!
قبل لا
يعتنيله الحوت
ياهو الينزل/ ايطلعه!
ياصدفه
التمر بسكوت
حتى الديرته/ اترجعه!
ومات ابحسرت
المكبوت
ومحد لَحك / ايودعه!
محد لَحك / ايودعه!
شهديلك ابهذا العيد؟ سولف واطلب ابسرعه!!
حسين االساعدي