أوكَف يازمن لاترحل أرجوك
وين ألكَه الأحبهم عفية دليني
عندي وياك كلمة وكلمة عتاب
ليش أحبابي هم الذبحوا سنيني..؟؟
أوكَف يازمن لاتبدي الأعذار
جثة بلا هوية شلون ترميني..؟؟
باعوني الأحبهم يازمن وتشوف
وآني شكَد فديتك مرة تفديني!!
ردتك من تظمني تظمني بالعين
مو دمعة رخيصة بلحظة تبجيني
وردتك عون إلية تصبر الروح
ماردتك أحبال تجتف إيديني
وردتك لوطحت تفديني العيون
مو أرحل وأعوفك لولا تنطيني
شأنطيك ونطيتك أحلى السنين..؟؟
وحتى إسمي كَلتلك إنت سميني
وردتك ظحكة حلوة تفرح الكَلوب
مو دمعة فراكَ البيها تفديني
وكَتلك لو رحت ودعني مشتاكَ
ماكَتلك بظهري إطعني وإنهيني
روحي الحبتك إشعلها كل يوم
شمعة بليل حبك لاتطفيني
تتسلى بعذابي بطعنتي شلون..!!
تصيح لخنجرك إي عفية سليني
أوكَف يازمن ماضاع الحساب
صار سنين أطلبك هسة وفيني
باقي إسم الوفاء بديني للموت
وبعدني إللي تعرفة ومابعت ديني
أوكَف يازمن ما أريد السنين
بس نشف دمعتي الظلت بعيني
