اذن براسي انتظارك
والهجر شگگ صورنا
فدوه بس دليني هَجرك مشتهي امشيلك زحف ،،
تيهت خطواتي مني بچدمي بس دربك عرف ،،
گلشي بيه يلوكلك هلبت تجيني ،،
تبوس عيني ،،
تمسح الظلمه بوجنتي وبيه تغفه شجمْ شمس ،،
يانحس مختنكه ريتي وحيل عطشانك نفس ،،
ياسواليفك مِلح غَزرت بذاني
وياظحكتك بيها اشم ريحةْ عرس ،،
وين رايح وانته وجهك نعمة الله
وشوفتك چنها صلاتي
الله مايرضى عليه من تروح ورزقي ينشف ومشي بدروب
الظلاله
لاتهج مني اعتنيلي !
انته صالحت الربيع بوجنتي ،،
انته طرزت العوافي بديرتي ،،
ياشذر محبس عرسنا وبيك گشخت غُرفتي ،،
جودَر جويريد بيه وظل مچانك بيه هيمه ،،
معرس العاكول مطره وهليتاني تعود غيمه ،،
وشتهيتك…
وأنته رب لكِلشي دافي…
ونته رازونةْ سجن مرت عليه وكحلت عيني بظواها…
اااخ يلكلش بعيد شكد قريب !!
هيج احسك بالنفس مرجوحه تلعب …
فدوه مرلي وفزز الصفنات بيه …
وخل اسولفلك عليه …
حالي بعدك هور ملظوم بكصب
جاسه الحنين وظل يدردم وحده...
وحده يبجي…
وحده يحجي…
وحده لـ الله يشوغ ويفرفح محنه اباب كلبك ينتجي !
انته يلكاشخني غيبه بهذلتني….
انته يلبايع تراجينا السمر
رخص البحي ،،
رخص الاذن،،
متروسه بلماصخ حجي ،،
ِتبناني يارب الدفو…
عشگك عشگ طفله وابو… !
كاظيها ختيلة طفل…
تِلبد مطلع نُص رجل !
#درجعلي
بسك يازعل
تعبان ومتعب الگمر ومنشف بدمعي الصبح ،،
وصياحي مايوصل الك شيل الگطن تسمع جرح ،،
ممدوده روحي اعله الدرب ،،
فارشلك العتبه گلب ،،
داسوني والداسوا عرف ،،
واحدهم معوز ضهر !
انطيته ضهرين او جتف ،،
درجعلي ،،
