الى كل شابه اتعبها اليتم والفقر ونزلت تستجدي لتطعم اخوانها الصغار
اهدي قصيدتي
.........................................
الفجر ...وي طرة الفجر
اكعد على اعتاب الرصيف
انتظر واحد يمن
وانتظر واحد يحن
وانتظر دينار واحد من حلال
من ايد مستور وعفيف
وانتظر رحمة الباري
يهدي كل واحد شريف
ينطي خبزه لليتامه
ويكتل بروحه حرامه
ويشيل عار جداوتي...بثلمة ارغيف
مرت العمال غبشه
واني ياخذني الحيه...وتاحذني رعشه
وتصير نظرات الزلم بضلوعي سيف
ومرت اولاد الشوارع
واحد يصفر عليه
وواحد بشهوه يباوع
تدور دنياي واذوبن
وانتجي اعلى الروح
ياروحي التجالع
يمر واحد
ويمر ثاني
ويمر ثالث
ويجي رابع
كل فرد مشغول بقضيته
بس قضيتهم وياي؟؟؟
منين مادور الوجه كلهه تطالع
ليش يادنيه شجنيت
شنهو ذنبي لان فقره؟
العوز ماخذني اعله بابج
وننزع امية اكصصنه
وانتظر ثلمة خبز...وعيني تطالع
اني حلوه ....وشكد جميله وكلي ايه
مرتبه وينحلف بيه
ولاعباتي انكلت سايه
اني من يحجون عني...
بيرغ وراية ولايه
بس شسوي....الفكر ماحذني غصب
وصرت للمايسوه درهم
نكته وحجايه
المهم
رديت العصر
خايبه ومشتعله نار
ردت اسوي روحي خبزه
واطعم اخواني الزغار
الف اسم الله علي
وعلى اخواني
وعلى الفقره
وعلى جاري المارحمني ؟شلون جار
وعلى كل واحد اخذ مني بلسانه
وشفه كلبه من فكَرنه واخذ ثار
والف رحمة على كل حر ببلادي
هتف بالحق
وبرصاص الغدر خار
والف رحمه على الدنيه
الكلهه ليل
وابد ماصارت نهار
