مو بگـد الجـرح لاتسأل عليه
وياجروح تهزك من احچيهه
فشلة عيوني عمت لو عمري ضاع
لو دمــوعي الگــبل ماباچــيـهــه
آخ لو بس ترجع ايامي هذيچ
چا هــدّمـت أحـلامك البانيهه
وچان رديت الدموع عله الجفون
ولـو تـمـوت گـبــالي مابـّديهه
وخاف ترجع بعد تضحك عالغشيم
شموع ضحكاتك يكــون أطـفـيهه
لكن شترجع بعد والراح راح !!
وحـتـى لو ترجع رخص غاليهه
ياسفن لشواگ صارت ذكريات
ويّ النوارس تـيـّهـت شاطيهه
وياعمت عين الجرح لوحن عليك
جــروح تحـني الراس ماخــليهه
كبل شلتك حلم بعيوني شجاك
تصيرخـنجر بالحلم تعـميهه !!
أمنتني شموع بالنار ومشيت
اشتظن باچر من ترد تلگيهه
صور خوف أبّالي ظـلت من مشيت
الموت يخـطـُف من يمــر طاريهه
وگف حته الوكت بيه وگمت اشوف
الساعه ميته ومـيـلهه يجـرْ بـيهه
ذابله عيوني وردت ليلك يفوت
وفات ملحك واشتهه يچـويهه
تگطعت بيناتنه كل الجــسور
الضفه عالضفه العمه يدليهه
گبل طاحت دمعتي بس مو أكيد
باچر يجــوز استعـّـِز انطـيهه
الدمعه مهره وتعرف الخيال زين
وهسه دمعاتي تعرف راعــيهه
لاتسولفلي عله جرحك عمري ضاع
الجرح يشفه سنيني وين الگـيهه ؟
تبچي چي مايك تبده عله السراب
انه روحــي لخاطـــــرك چافيهه
كون مو گد الهوه شجابك عليه
چـفـوف مو يمك شكو تلاويهه
لاتبرر ذبلت الورده بـــــديك
انت موگدهه الشمس شعليهه
ورده ماتت المن ترشلهه ماي
وهذا ياهو الگـالـّك تحـييهه
صرت كتّالي برگبتك دمّي صار
وذيچ روحي بذمـّتــك خليهه
سالفه العاف القفص يرجع عليه
شعــنده راجع بعــد لاتحـچـيهه
انه ردتك لمن چانت بيه روح
ترجع المن بعد روحي شبيهه
التفگه المكتره بساعات الثگال
فشله من يگضن تجر سرگيهه
ولاتعيرني الجرح غير انت هاذ
انه لو اعرف جروح اشريهه؟!
تطيب لومهما تمر بيهه السنين
جروح المسودن شمس تچويهه
ماتــدوم وداعــتــك يومــيه راي
بدمعه وبضحكه السنين أگضيهه
شالتك دنياك بس باچر اتطيح
وترجع تسحگك سحگ رجليهه
مثل طبع الگاع مره تموت خوف
ومرّه يصعــــد للشمس برحيهه
شوف وين وياك وداني العتاب
خــــل ارد الســچـّه ماماشــيه
وهيه تصفه شلون مو شغلك هذاك
روح عـــنــّي وربـــك يصـفــّيــهه
