انا الجندي المشمم بالمهد بارود - اشعار عراقية 2015
انا الجندي المشمم بالمهد بارود واحنه صغار اخذنه على الفشك شمره
انا من انقل جدم توكع دول جواي انا الجندي العراقي القائد الثوره
من اكولن ياعلي داعش يذب هدوم قبل سواها جده وطلع العوره
انا من ألبس مرقط يطك ظهر الكاع انا شلت العراق على الزلف جمره
انا من داهمت خرمشت وجه الغيم انا من ارفعت شكت بيدي الكمره
ذيب ومن أنام عيوني مفتوحات انا ابن الجنوبيه وعصبة السمره
نعم جندي ولكن صقر لو هديت اذا مابيده صيده مايطب وكره
مجرب من فتت زفيتهم ال سعود اخو خيته الزلم جيتت على الصحره
ترى الصوله الشفتها على الفضائيات من ذاك النصر ماطلعو قطره
الدليل بصفي اخوي انقتل مارديت ايدي تهوس وايدي تحفر قبره
انا يشماغ الجنوب وغطرة ابن الدليم ياسني يا اخوي رغم كلهن ماخذت نظره
اعرفك ماتسويها وتخون الزاد كضينا العمر خوة بلبل وشجرة
اذا تعطش بماي وجوهنا نرويك جوعان الجنوب يمدلك السفره
وعلي من حلك اخوي اخمش خبز وانطيك بس لاتنطي بيه لخاطر العشره
انطيني ايدك احلفك بالعزيز عليك مو وقت المجافه ومنك اتبره
انا ابن الموصل والانبار وديالى فزعت فزعتلي كبل لاتفزع البصرة
عراقي صوتي سيف واذبح على الصوت مو كاطعلي شارع واذبح بشفره
اذا تلتفت جندي يطيح ملح الهور بكد مابنصنا المرجله مخضره
انا من ارجع عدل شكثر امي تختض ما اريدك تجيني جية الكشره
يمه مرضعتك مراجل حتى تحمي الكاع اشو رديت كنت بجبهة لو صفره
لطبلي بنفس طب لأمك بتابوت اريد ام الشهيد اتسمى لو مره
خيطت الكفن بيريه من طبيت انا ويا الموت زاد وكهكهت فتره
الفشك ماعيب ماركيته بالشاجور الفشك ركيته بالكافور والسدره
للشاعر الكبير محمد الاعاجيبي
