عن لسان زوجة شهيد عراقي..
تراچي دمع
والليل خنسة
ومامش نفس
بالريه
گالولي باچر جيتك..
وانه خذاني الوهس
چن ليالي العرس ردت
من اجديد
عطرت السوالف
وميشت اجروح هجرك
وأصبغت لچعات الوكت بيه
وچم حرز لفيت
بكوسر الچربايه
ولميت امخاديد شبگتنه
وشيرت تعب شوگي
وإشعلت بشباج المناطر
كومة ضحچات
واحلام امس
وأنطر الدربونة تجيبك
أچوتلك أسراري الزغيرة
وأفرشلك ارموش عيني
وبين نبعات صدري أفييلك
وألبسلك ، محتارة شلبس
وشنهو يلوگ للمشابگ
ويا نفنوف تترجاه إرويحتك
ما أريد أيدك تجيس
خام فوگ جسمي
وتلفلفنه الظلمه
حيل بكل وكاحتنه
وأچودر حيل بالظنكات
وأصيحهن عليك
ذيچ الليالي
رد يا هلبت ترد
ولا ترد خشبة وبعلم
ملفوفة
ما بياش بشهر عمري
ألبس سواد إعليك
وما بياش أبچي
توهن بدن ضحچاتي يخضرن
ما لحگن للشفافي يطلعن
ولساع حنتي بچفي
يمدلل ليلتك مو ليلة
عمر وأنچفه فوگ صبخة
وتبده وياه كل حصاد أيامنه
وك بعدنه تونه نزرع
جتنه ريح سوده
ذبحت كل سنابل شوگنه
وحرگت كل بيادرنه
وتلولح من إبعيد
ذيچ صفنتنه
والشبيبيچ مخنوگ بدمعنه
أحاه شيرد ذيچ لمتنه
عاتباني إعليك كلشي
حته أزغر سوالفنه
وك ما تنچهب إوجوه الناس
ولو نشدوا شگلهم
وك تاكلني الصفنه
يا واهس العشرين
ماعديت
ولا لاحت شمسها إلنه
يا عمود البيت
وكشحة الديوان
وهيل دلتنه
والشرايع بيك متونسه وأمنه
صنطه الليل بلاياك وموحش
چان الليل مزهر بكل ونسنه
وك ماصخ يظل الزاد
والماي وذيچ خبزتنه
يا أول فرح عمري
والشوگ وليالي سعدنه
كل ليلة أشوفك
ذاك انته الصدرك بحر
وبطيبه أمغرگنه
خايب لا ترد بخشبات
وملفوف برايتنه..؟
17/05/2017
العــ عقيل ــراقي
