تنساني جذب ماصدّك اني بهاي
لان طبعك وفي وما يوم تنساني
وتلكاني جنح لو يوم الي احتاجيت
بس باوع الروحك بيك تلكاني
الساني السان شاعر موش ياهو الجان
للساني تشوف ايصفّك الساني
وبس ليك القوافي اتسطّرت الماز
والغيرك تضوج وتختل اوزاني
نيشانك اشوفه انجوم يمي اتدور
ومن تحتاج اني الكمر نيشاني
يا دم الكلب تدريه لما اتروح
جلد حيه يصير عليك شرياني
وبستاني بغيابك حنظل وعاكول
ويتحول ورد من تطب بستاني
حط ايدك بأيدي حان وكت الشوك
اذا كلبك يحبني احجيهه شمتاني
اردانك من نقص من لحم زندي انطيت
تستاهل كلت ماجملك ارداني
كل ضنّك اعوفك مستحيل اتصير
هم شايف بياض بوجه سوداني
كلما ارد ااذن للعشك الكاك
واكف يمي تسمع صوت اذاني
ومن تبدي وتكبّر يوج بيك الشوك
اصيرنلك حمد وبشوك تقراني
ابني ومن افكر اهدم البنيان
تجي غفله وتكمّل ساس بنياني
احجيهه بصراحه الخاطري اترجاك
من كد الشعر مو ملني شيطاني
صدّك لو كلتهه الكلب يركض ليك
وتذب الباب تركض ليك حيطاني
