[ALIGN=CENTER][TABLETEXT="width:90%;background-color:royalblue;"][CELL="filter:;"][ALIGN=center]
ذاك آبويتنا ،.....
بذيج الحريجه ...... آهناك .
وانا بلا طريج آهنا .
آه ..... آحّاه ،
أشمّن عن بعد شعواط .
ما أدري ،
هسّه آشلون حال آعكَال آبوي .....
وشيلة آمي آهناك ؟
وكَلادة أخيتي وزيجها المستور ،
ومخاديد العروس وسنبلة روحي ،
وكاروك الرضيع وخضرمة الكَماط ،
وشجم فلس متوضّي بعرك كصتي ؟
هسه آشلون حال آستارة الشباج ،
ورسوم العلى الحيطان ،
والبستان ،
وعصافير الندى .....
وعشوشها الماشايفه الدخان ،
وماي اجروفنا وكل شي عزيز اهناك ؟
هسّه آشلون حال اجناح كَلبي ....
..................... المن سنه ما حاط ؟
امورّث من سنه وما حاط .
مثل كل شي عزيز آهناك .
حريجه وكل عزيز آرماد .
آه .... آحّاه ،
مدري آشلون طاحت جفّة الميزان !!
هلي صفناتهم ميزان ،
يعرك مستحه شخاطهم ،
......................... ما يحرك الخوان .
غريب العود ، هذا الواج ،
وغريبه جدحة الشخاط .
آه .... آحّاه ،
مدري آشظال من ذيج الحريجه آهناك ،
جن زخة بواجي آهناك .
هلي آمن الخوف ما يبجون .
هلي آمن المستحه يبجون .
ما أسمعهم ، آبعيدين ،
بس بروحي آحس يبجون ،
بس بروحي آحس .......
مِنّا لَحَد ذيج الحريجه آعياط .
حريجه وكل عزيز آرماد .
شجاكم ؟ شنهي هالنومه ؟
جا يمته تفز بغداد ؟
[/ALIGN][/CELL][/TABLETEXT][/ALIGN]
