حزام الضهر
الشاعر جواد داغر الساعدي
عضيدي ولو حجيت اتونس بطاريه
الما عنده عضيد اضهره إِبلايه حزام
انا اعرّف الخليل وگلبي حار وياه
ياما وياما اعرفه وبينتله ايام
وي الريح يسبگ حار من تنخاه
واملاگه وي وجه الماو كله الثام
انه شحجي ؟ النخل شيّوصف الفلاح ؟
الساكن بالنهر يعرف حجي البلام
الغيمة التثگل تصب سالفتها بزود
ويصب وگفات لو ثگلت ببالي احلام
من اتباها حگي واكشخ بطرواه
تقييم الورق كلّه بحجي الأقلام
القصيدة التنكتب لوما هدفها تموت
لو ما صويحبي التاريخ كله اوهام
احير منين اجيه الرحمة كلها أبواب
ورحمة ربي أهو بكل باب اشوفه اسلام
مثل الذهب يلمع صاحبي بمگفاي
ما بيه كل دغش والطيبة بيه تسگام
وأعرفه هواي يعشگ طاري العباس
وكلش يختنگ لو صاحبه ينلام
شاقيته وگلتله بضيج اذا انخاگ
گال الخلفتنه مخلفتنه ازلام
