دارمي عراقي ، حزين ، عتاب

[رومانسي بس منسي]

دارمي عراقي ، حزين ، عتاب

==============​

هنيالك انته اتنام​

وليلك بلا هموم​

صدگني من فرگاك​

من نومي محروم​

==============​

شوف شكثر ولهان​

وتعبان بالي​

بس إلك روحي اتهيد​

والله يغالي​

==============​

هاك الگلب يفلان​

أخذه برسالة​

گعدني نص الليل​

يشكيلي حاله​

==============​

لو تدري بيه شصار​

من غبت عني​

مثل اليهيم بليل​

وبراسه جني​

==============​

إحنه بجسد روحين​

والدم فرد دم​

والگلب واحد صار​

بالفرح والهم​

==============​

مرهم دواها الروح​

وانته الها مرهم​

ماأرهم بلياك​

گلي انته ترهم​

==============​

نار الدمع بجفاك​

عالوجنه طايح​

من عندي راح الشوف​

من گتلي رايح​

==============​

إسمك طبع بالعين​

كل لحضة اشوفه​

وحبك سلك بالروح​

مو هينه اعوفه​

==============​

علمت روحي اعليك​

وتريد اعوفك​

مجدي أدگـ الباب​

بس كون اشوفك​

==============​

نبته وغصن مكسور​

وبشحت الماي​

هذا آنه حالي اعليك​

من تگطع اوياي​

==============​

يسألني ملك الموت​

روحك شجاها​

گتله حبيب الروح​

گبلك خذاها​

==============​

موبيدي هاي الروح​

سلمت أمرها​

حاير شسوي اشلون​

والحب دمرها​

==============​

عين الك روحي اصير​

والدمعة دمي​

وريت الهموم البيك​

تنقلها يمي​

==============​

من علو سبع جبال​

روحي أذبها​

واكتب على التابوت​

حبكم سببها​

==============​

صدگني ما ناسيك​

وبدمي تجري​

شنهي المعزة البيك​

بس الله يدري​

==============​

صدگـ إلك حنيت​

واليحن بلوه​

مابيه حيل أنساك​

چاهيه گوه​

==============​

من أرسل الكلمات​

ماتشفى الجروح​

كون من ادوس ارسال​

أرسلك الروح​

==============​

گالولي روح بعيد​

وانسه التريده​

گلت البعد شيفيد​

مو گلبي بيده​

==============​

ريت الگلب بستان​

وانته الورد بيه​

لو نشف منه الماي​

بدموعي اسگيه​

==============​

ريت الگلب نقال​

منك فلا جوز​

الدم رصيد ايصير​

بس الك محجوز​

==============​

هاك الگلب والعين​

تبقالي بس عين​

لو هم بعد تحتاج​

أگسمها نصين​

==============​

شگد انته عني بعيد​

بس روحي تهواك​

أدفنها عدله الروح​

لو مرة تنساك​

==============​

الخوه بس وياك​

تنحسب خوه​

من راسك لرجليك​

تنگط مروه​

==============​

بالحلم چنك جيت​

من ذاك الغياب​

گبل ايدي شفت الروح​

فتحتلك الباب​

==============​

هجرك سهم چتال​

بالهم رمانه​

وشوف آنه من فرگاك​

ماچني آنه​

==============​

هم حلو هم سبورت​

فوگاها كشخة​

حگه الگمر لو راد​

لصورتك نسخة​

==============​

تدري شعمل فرگاك​

من رحت عني​

جثه على التربان​

محد دفني​

==============​

صاير مترسل ليش​

ميهمك امري​

هنه خمس سنتات​

چنك متدري​

==============​

روحي امنهد فرگاك​

ماتقبل تنام​

أذكرها نامت يوم​

قبل أول العام​

==============​

للدوم اسولف بيك​

يارفعة الراس​

الدنيه كلها بخير​

لو مثلك الناس​

==============​

شگ عيني واشرب ماي​

واترس چفوفك​

بس وحده خلها ارجوك​

بيها ارد اشوفك​

==============​

بالعتبة شفت دموع​

من طول جفاك​

ثاريها حته الباب​

تبچي اعله فرگاك​

 

[Umkalthom]

رد: دارمي عراقي ، حزين ، عتاب

طرح راقي

ابدعت الاختيار اخي

ودي❤

 

[عازف الصمت ؟]

رد: دارمي عراقي ، حزين ، عتاب

رووووعه عاشت الايادي ع طرح

ننتظر القادم

 

[رومانسي بجنون]

رد: دارمي عراقي ، حزين ، عتاب

صاير مترسل ليش​

ميهمك امري​

هنه خمس سنتات​

چنك متدري


جدا روعه يسلامووو
​

 

[رومانسي بس منسي]

رد: دارمي عراقي ، حزين ، عتاب

شكرا على مرورك العطر

 

[❣★Ŗ๑๓ąиtič★❣]

رد: دارمي عراقي ، حزين ، عتاب

شكرا على الطرح الرائع
ربي لايحرمنا من تواصلك
دام الابداع والتألق
تحيتي

 

[رومانسي بس منسي]

رد: دارمي عراقي ، حزين ، عتاب

 

[فهد البغدادي]

رد: دارمي عراقي ، حزين ، عتاب

رائع الطرح وافر العطاء

أكاليل الزهر أنثرها في صفحتك

مع خالص تحياتى وفائق تقديرى

 

[Burer Hadaad]

رد: دارمي عراقي ، حزين ، عتاب

الله الله عاشت الايادي