دورلك عذر لو رايد تعود
ما مسمـــــوع أريــده أبين الاعذار
يلجانت جهال أعــذارك ..شلون؟؟
كـــــد جرحي أحسهن صارن كبار
كبــل تتمنــــى عينك تحجي وياي
شجاك ومــن شفتنى بسرعه تندار
ألكبالي جذب.. مو أنته معقــــول؟؟
أبلحظـــات ذاك.. يصيــــر تذكـــار
كبل وجهك حضاره بنص الضلوع
باوع زين.. صايــــــر كومه حجار
نطــــرتك والجرح هم ينطر وياي
بعده صــــواب بعدك بالكلب حــار
تجـــــازيني السهر,الشوك, الدموع
لو راســــي التعب مـــن كد الافكار
بنيت أباب بيتك حســـــــرتي سنين
حمامــــــه وتبني عشها بفتحة الغار
مــن شفتك تعــــرف شلون ملكاك؟؟
مثل بدوي تجينــــــي ويطلب الثــار
بينـــه الناس جانت تضــــرب أمثال
هسه حلوكهـــــــــم من تحجي تحتار
وحتـــى الدرب صايـــر كله شمات
مــدري شلون تدري الصــار والدار
حبنــــــــه الجان.. لا ما يشبه الغير
دغش متروس حبهـــــــم كله زنجار
ولكن... هسه كلــــــي شغيرك هيج
تره طيب الكصب من طيب الاهوار...
يلرحــــــــــه غيابك طحنت الروح
واجه جف أنتظــــارك حطها بالنار
ألملم صفنتــــــي وادفنه بالشــــوك
بس بلحظه صارت كلــــــها طشار
أذا ناسيني باوع بس بالجفــــــــوف
أحلفك بالدمع... ماباقيـــــــه أثار؟؟
مسحت دموعي كلــها بحركه وياك
وأعض أصبــع ندم من اذكر الصار
روح ولا تجــي يالمات ذكــــــراك
ما محســوبه جيتك.. حتـــــى خطار..
[flash1=http://im35.gulfup.com/fFv7L.swf]WIDTH=1 HEIGHT=1[/flash1]
