رجعت وما كدرت احمل زعلها ..
كبل لا تنجرح ويضيع املها ..
رجعلتها وراي احجايت الناس ..
وتحملت العواقب من اجلها ..
عفت جروح عندي وياهن اسرار..
وما عارف جروحي الرايحلها ..
رحت محتار مثل الماشي للموت ..
تايه والجدام تريد ادلها ..
رحت شايل قلب من ينبض يخاف ..
وخطوات التردد يستحلها ..
رحتلها لان مو اني اليبيع ..
وزلات المقابل يستحلها ..
رجعتلها ولو بس اليحب هيج ..
اسئلة الضعف ما يلكه حلها ..
ومن يبيع روحه عله السجاجين ..
من طعنات ظهره ينزللها ..
رجعتلها ضوة شارد بلا خيط ..
كلت ما اريد يوصل كبلي ضلها ..
ردت اوصل كبل لا عينها تفيض ..
وكبل لا كطرة تنزل من كحلها ..
مشيت وخذت وياي المواعيد ..
القديمات الكبل جايبهن الها ..
ليلتها البحر بي صافن الروج ..
والغيوم الثكيلة التم شملها ..
ليلتها النجوم الفوكي قضبان ..
واقفاص البلابل مو مثلها ..
رجعتلها وكلت يلة الصلح خير ..
وكلت ما اخشن الروح علخلها ..
بعدني العشرة بيهن ضال دخان ..
واكول من ارجع العشرة اشعللها ..
تخيلت من اجيها كبالي شتدكول ..
واذا دمعت يمي شراح اكلها ..
كدرت ابتسامتها علملكاي ..
وبديت ارسم على الواهس شكلها ..
بنيت ضنون بيض بليلة الخوف ..
وموت الوساوس كبل اجلها ..
ابسامت شفتي الغركانة بالخوف ..
كدرت ارجع من الموت انتشلها ..
رجعتلها نهر شاربني الفراك ..
وانطيت اليالي دموعه كلها ..
وانه ما بيه اضوك الموت مرتين ..
واحجايت الشامت مو حملها ..
اخذتلها سوالف صوغة وياي ..
بس ما عرف من اوصل شكلها ..
ومقابل صوتها ولحظة هوة وشوك ..
على راحة البال اتنازللها ..
رجعت وكون ما راجع تمنيت ..
وكلت يا ريت لو ما واصللها ..
فهمت طيبتي وجف الصلح ثار ..
واتصورت راجع حته اذلها ..
