عمرين ضاعن بالگهاوي

[آهات حالمه]

بغداد
ليل محمّداوي
عاگًول،
يجرح من يِداوي
عمرين ضاعن بالگهاوي
وشُبّان
وگبور
ونَعاوي
……
وتاه المِجَر
بدروب بغداد
عبيچي،
وكَرَك
ونذور
ومراد
والهِدِمْ بايد،
والمَتِنْ باد
چا وين فَزْعَتْكَم يلولاد؟
…….
سَمَّيت
واليذبح يِسَمّي
وشِلْتْ الحِزِنْ
بِشْليل دمّي
كِلْما شِلِتْ بالليل همّي
أمسح دموعي بفوطة أمّي
…….
هلبَتْ تناغيني المواويل
واحترگ
واطفه
وينشغ الهيل
هلبت
وأگولن:
هلبت نميل
ونبيع دمعات المناديل
……
سمّيني،
يمته تفوح بالروح؟
وحروفي
تلتلمّ بيدك جروح
ما بِيَّه الوح العِنَب
ما الوح
طاسة الجمر
ونهودك الفوح
…….
بغداد طشّتني
وطِحِت ماي
وبِعْت الشمس،
والليل شَرّاي
نخَيِّطْ بذيچ،
اتْفَتِّگَتْ هاي
يا رايح،
منين الحِزِن جاي؟





منقول

 

[الرااااكد]

آهات حالمه
نقل جميل
سسلمت الايادي
لاخلا ولاعدم

 

[آهات حالمه]

شكرا للمرور البهي الذي عطر المكان
ارق التحايا