((قدر نصبني شاعر))

[آهاات حالمة]

((قدر نصبني شاعر))




قدر نصبني شاعر لو بدي ماصير
وأعيش اويه الرعية أبنفس قالبهه
اصدگ بالجرايد وامشي للكشاف
واحكم عالزلم من طول شاربهه
يحسبون الصبحهم حتى يتريگون
مشكلتي اختلف مو هيج حاسبهه
آنه اريوگي ورده ابعتبة الشباك
اتميل ابطولهه وأحساسي يحلبهه
سعادتهم تعاسه ابعالمي الشفاف
وضحكتهم بواجي أوعيدهم جبهه
كلمن عنده جذبه ايگولهه ابنيسان
لعبه ابلا مشاعر استحي العبهه
ماعودت روحي اتجذب ابنيسان
خاف أبشهر آب الناس اسلبهه
كالو بعد لأحد يصدف الاثنين
من حقي اعترض ولحاله اجذبهه
الثنين المر علي نفس احد المشؤوم
هم سميته احد كودن ايشبهه
زعلو من كلامي صعب يفتهمون
ماعدهم نباهه اوكلهه منتبهه
صاحو لاتكمل انعل الشيطان
افكارك غريبه امنين جايبهه
رجموني ابخطب نايم عليهه اتراب
ماصدگ بعضهه.اونصهه.واغلبهه
سوالف راكده ابمستنقع التكرار
توصل للاذن تعلسهه وتذبهه
كرهوني لان جادلت.بس للقير
مامضطر احب اشياء ماحبهه
يعجبني الحجاب ابروس البنيات
بس ارفض بنات افكاري احجبهه
تجار المنابر برجوازيين
محلات الذهب مو هيج مكسبهه
صاحبتك الدنيه واظن كلش عيب
تصرخ فانيه اوتلعنهه وتسبهه
اخذ بالجنه قصري انطيني كوخ ابجول
وخذ مليون ركعه اباسمك اكتبهه
جرب عيش مثلي ابغرفه العمدان
خمس اطفال وامهم گوه اعتبهه
على خلوة غزل اجبرهم اينامون
ماجنهه ام جهالي .جني ناهبهه
اريدابكلشي اصارح قررت ماخاف
اذاني السكوت اعصابي تعبهه
امخليلي قلم خاطر يحلي الجيب!!
الجيب الخاوي خاوي القلم مينبهه
احس ماتت حقيقه ابمعركة تزوير
اوعيب اعلى الاقلام اتضم مخالبهه
النقط فوگ الحروف ايحطهه من ايثور
اوسلاطين الدهر ماحطته ابعبهه
سلاطين الدهر ماحطته ابعبهه
​

 

[قيصر الحب]

رد: ((قدر نصبني شاعر))

كل الشكر والامتنان على روعهـ بوحـكـ
..
وروعهـ مانــثرت .. وجماليهـ طرحكـ

 

[MS.Shaghaf]

رد: ((قدر نصبني شاعر))

راقت لي كلماتك من أول عنقود لآخره



دمتي في حمى الرحمن



تقبلي وافر أحتراماتي

 

[آهاات حالمة]

رد: ((قدر نصبني شاعر))


شكرا للمرور العطر
نورتوا الموضوع
تحيتي لكم

 

[كيان الم]

رد: ((قدر نصبني شاعر))

مااجمل ماتحمله من احساس
كلمات تخترق القلب بصدقها
وتسلب من العيون كامل اعجابها
سلمت يمينك ياالق
يعطيك العافيه
لروحك السعادة
تحيتي