الحمد لله اكتشفتك گبل لا اشريك
ما غشني الصدف لو خدع عين الون
بس من فوگ مطلي ومو ذهب ليرات
اول مالمستك بين المضمون
انه خبره سنين استاذ بالتمييز
اقره بگلب ظيف الغرض والمكنون
وبالفظ الشفايف دون ما تفسير
اقره اللعنه والعان و الملعون
واميز الفارغات من الترسهن خير
لان من وضع جسمه مبين الماعون
ولو شوشت وجه الگاع بعض الناس
حتى اتيه بيهه اچدام اليمرون
لكن ما اتيه الگاع نفس الگاع
وانه اندل كنزهه بيا كتر مدفون
مرواح الوگت بس ترفع ايدك فوگ
يعزلك الصافي ويعزل المأفون
ماتعبر عليّه كل ما لبست اثياب
ياثوب التلبسه من العرض مخبون
ولا تستر عورتك واضحه الكل عين
وانه بوجهي وگفاي وبالصفاح عيون
مثل ما انتَ اشوفك حتى لو صبغوك
انه خبره سنين واعرف المدهون
اسود گلك اسود حتى ذاتك ليل
بس مو للمسامر ليل لليبچون
مغتث من سوادك حتى لون الليل
ويرفض لون بينه وبينك يشبهون
الحرمل والگرنفل بالسواد اخوان
بس شوف الفرق مابين وحشي وجون
مره الون يغري ويعبر اعله العين
وعندي اعيون تكشف سيف ميه لون
يارخص السوالف كون اسولف بيك
ويا ذله من اذكرك بين اليذكرون
ما نادم عليك وروح لا رديت
شلتك من خيالي وروحه اليرحون
راحت ناس گبلك واچت عگبك ناس
مدري شلون راحو و اچو مدري شلون
مرور الطيف مروا وانتهه الموضوع
ما نگطو بذهني وكلشي ما يعنون
وانه واضح تماما بالشته وبالگيض
ما اصلي ويه موسى وارگص الفرعون
انه سنيني رحه وطاگين عمري بذور
يمر من خلالي ويوگع المطحون
معقوله الاذبه انوب اردله ردود
واصير اشعب وارگض ويه اليرگضون
انه غربيل واصحاب النوايه اذنان
مجرد ما اهزهم كلشي مايصفون
بس حركت اديه بهمزه الغربيل
واحد تلو الاخر گامو يسقطون
