لا يضل بالك علي ماراح اموت

[mohammed.shams]

قصيدة لا يضل بالك علي ماراح اموت​

- سيف الحلفي (مكتوبة) ​

شعر فراق حزين مكتوب 2022​

لا يضل بالك عليّ ماراح اموت
الدنيه تخلص وانه عايشها ارتجال
ابعمري ماشـايل ثگل بس من خـذوك
بصدري حسيت ابوجع صخرة بلال
وآنه چنت ادري بنهايتنه الوداع
من دريت بحظي مابي كل مجال
من گمت بعيوني تحله واشتهيك
الشمس تحلى شما گرب وكت الزوال
تيه عني وكون اضيعك حتى اعيش
اشما يغيب الحل كبر عمر السؤال
وشرد اسولفلك علي يوم المشيت
خاف اقهرك مااسولف بالثگال
دمعة المفطوم واحساس الغريب
وكسرة الهستوه خاسر بالنزال
وفشلة المگطوع جدمه وسابقو
وصفنة المنسي ولا مر إعله بال
ووحشة اول ليلة للميت غريب
ذن عشتهن كلهن ابيوم الرحال
شيخنه المأذون مبيوگه العروس
وخر الچفيه عقدك مو حلال
هيه صح مو مرتي بس مزوجين
لاتخرب عائلتنه الـ بالخيال
ابالي غرفة نومنه وذاك الأثاث
وحتى حضرنه ملابس للجهال
وانه وامي امناطرينك مااجيت
محضريلك چنه من ذاك الدلال
وچنه من انشوفك انبطل الصيام
غير عدنا حواجبك تسوى الهلال
ولا تگلي الله يعوضك مااريد
كل خضار الدنيه ميريحلي بال
من غبت بعيوني ضل بس السواد
واحلى شي يعجبني عالگاع الخيال

كفرت ابكل صلاة للحب .. والآذان
منهد ماشردن وعودك .. والآذان
بچيت ابعيني وبروحي .. والأذان
بچت وسوالفك طاحت بديه

من يوم المحتّه وياك .. ماعان (مًعا)
الجدم خطوة اعله درب الدار .. ما عان
گعدت ابچي وفصوص العين .. ماعن
لحد ماصورتك صارت بديه

انحلت وانياب اضفر .. مايقلعَن
وبچيت ودمعي شوه .. مايق العين
تره مصابي بوداعك .. مايقل عن
مصابي من دفنت امي بديه

الشاعر ~ سيف الحلفي

 

[ألـــــ غصة ـــــــم]

[BGCOLOR=rgb(209, 213, 216)]دائماً لأطروحاتك فلك خاص[/BGCOLOR]
[BGCOLOR=rgb(209, 213, 216)]يضم المبدعين بين جنباته
ويضم السحر بين اكفه
فهنا اجتمع فن الانتقاء وفن روعة العقليه
سلمت يمينك
ولك احترامي وتقديري[/BGCOLOR]
[BGCOLOR=rgb(209, 213, 216)]غصة الم[/BGCOLOR]

 

[mohammed.shams]

يسعدني ويشرفني مروووووورك العطر
لك مني اجمل باقات الشكر والتقدير