لذكراهم المفجعة نستذكرهم
ولأرواحهم الرحمة والخلود
نذبح ليل ونخنك نجمه..
واشموع انضوي
وأنشف دمعاتج دجلة
نحرك كون بوسعه
ونشد ادمومنه بوجعه
وبطاريكم انوكف الدولة
شنهي الشمسيه اخلافكم
وشنهي طعم الزاد بلاكم
حنظل وياكم يحله
خلها ترعد خلها تمطر
بشهكات الفاكدة
منهو اليعلم
بس الله وحده يحله
وتشجيلك سر الغابوا
وكلايد منحورة بلا ذمة
وعيون اتشابح
عله الذله
وعيون اوليدي بعين الله
يحلم باجر أنزفه
ونطرز شباجه بالميسم
ونفكس عين الليل بكحله
وصي الغادر بالك ترجع
مهرتنه اتعارك كوه
لو مرها مثلك عله
انصفنها دنياك بزود المنجل
ونفرش كمرات مضوايه
ونحط اركابنه للملكه
أنطيحهن نجماتك لو علن
تتشابج مساحينه والفلح
وتغفي بسدنه كل حره
وكل عايل بينه انذله
وي هو وي هو
باجر كرب والحك
لابد انرجعه
وانشف دمعات الثكله
مامش عيب بدم الثار
ومانغتر من نحمي الدار
حنينه اجفوف التانت
حبها وما رد
بدموم الراحوا
ياجيلات الثارن ولكم
وكل جيلة بعريس
اتهلهل
تشكك اقلوب الحبت
وتهمل اعيونها بلا دمعه
وتشبج عله بعله
مَطين الليل بنجماته
وسهرنه ادلال الديوان
كله مناطر
بلجن ساعة ويردون
وجم ساعة مرت
وعطبت كهوتنه
واستاحش الدوان
مامش شبان
وفزت دلتنه بنارها
وفناجين الصبر
وجزت عروسك
يبني الكذلة
تموت بحزنك..
تسكت مرة
وتفرفح مرات
يا ليل اسكر بذكرهم
وخلي اسكيك دمعي
خلص صبرنه
وتسلفنه صبر
جزعانه ليالينه
تصيح شنهي ما يردون
دنيه بلاهم
كلها لولهَ
نذبح ليل ونخنك نجمه..
واشموع انضوي
وأنشف دمعاتج دجلة
العـ عقيل ـراقي
التعديل الأخير:
