محادثة بين بنت وولد
للطرافة
بقلمي
...
هو
صار ساعه وهي ماكو
وين صارت هالبنت
الها بروحي مصايب
وأدري يمكن صخمت
هسه بله شبيها هيه؟
والله كلشي ما كَلت
هي
صار ساعه وهو ماكو
ولا مسج لا بيه خبر
يعني فوكَـ الكَاله هو
يريد مني اعتذر؟
صح احبه وروحي بيه
شلون بله انتحر؟
يغيب عني ويجي يضحك
واني خبله وانتظر
..
خلي احاول اتصل
وبسرعه اكَله بالغلط
هو اني بحال حُبك؟
بالخطأ والله وفقط
هو
اووووف من هاي الدقائق
ولشوكت ابقى انتظر؟
تعودت روحي عليها
وجاي اجاهد بالصبر
وخلي اكابر بالزعل
هيج اتظاهر فقط
وبالصلح بس آنه ابادر
وهذا اعتبره غلط
اييي رنتتتتت فدووه الها
حتى بالرنه عسل
والله ما اسمعها نغمه
والله اسمعها غزل
الوووو
الوووو
نعم ياعمري وحياتي
نعم يا اجمل بشر
والله كلشي يكَول أحبج
اللحظة من دونج قهر
هي
اسفة منك اخويه
الرنه صارت بالغلط
وشنو هالعمري وحياتي؟
هالحجي منك شطط
ومثل ما كَتلك اخويه
والله صارت بالغلط
هو
هسه لو ابقى ارزل
هم يجي واحد ويلوم؟؟
منو هذا الــ ((اخويه))
عسل مليان بسموم
والله أحس الدنيه ظلمه
سما ومتلبده بغيوم
خوش راضي بالاخوه
شكراً بكَد النجوم
..
وطب.. سد التلفون
هي
هي وتحاجي نفسها
طاح حظي وصخمت
يا اخوه البيهه اسولف
وآني باحضانه عشت
هذا اغلى الكون عندي
ووحده بس وياه ذبت
هو دنياي وجنوني
وابقى احبه لو شبت
لعنة عالفكرة الغبية
كارثة لروحي جبت
هو
يعني معقول السمعته
جنت واهم بالغرام؟
وشعقل هذا الي عندي
مو عقل هذا انفصام
هيج تحسبني اخوها
وراح كل ذاك الهيام؟
الف لعنة عالمشاعر
والف لعنة عالغرام
جنت احبها وهسه اخوها
مو عشكَـ هذا انتقام
هي
هسه بله شلون اني
اعتذر عن الحجيته؟
هذا الاوليد الاحبه
بعمري وبروحي اشتريته
راح اخابرله واكَله
انت ياغالي الهويته
انت يانور لعيوني
حُبك بدمي سكَيته
ومن نسيت الكون كله
والله عشكَكَـ ما نسيته
و.. اتصلت
وهو
يسمع صوت الاتصال
ما ارد لو الف مره
كافي من عدها السمعته
مره احبك مره اخويه
هذا مو حلمي العرفته
وين جانت من تسولف
كون وياه بغرفته
بس يله للمره الاخيره
راح أسمع كل حجيها
ووالله لو كَالت اخويه
أكلب الدنيه عليها
الووو الووو
الصوت مو واضح أسمعه
منو وياي العفو؟؟
رقم بس وياي يطلع
أحجي يا عيني منو؟؟
هي
للأسف ياعمري انت
هيج تحذف الرقم؟
انت كل الكون عندي
وأبد ما كان العشم
هيج تقهر كَلبي يعني؟
منك استاهل ألم؟؟
والله من كَتلك اخويه
جنت اشاكس بالاسم
انت اخويه وانت ابويه
الراية تبقى والعلم
انت في دنياي نعمه
وأحمد الله عالنعم
والله أحبك ياحبيبي
وتبقى محبوبي الأشم
هو
وانتي كل عقلج حياتي
هيج انساج بسهوله؟
لو نسيت الدنيه كلها
انتي كل عمري وفصوله
ومو رجوله انساه حُبج
أبد والله مو رجوله
ولو بطل الينسى حُبه
الف لعنة عالبطوله
هي
اوووف منك ياحبيبي
شكَد حلو هذا الكلام
اخدر بكل حرف منك
وأسكر بهذا الغرام
يله لاحضاني تعال
اني أحبك والسلام
وخلي ننسى الكوون كله
وننسى أسباب الخصام
كَول أحبج كَول اريدج
هيج حُبنه والهيام
وخلي نفطر بالمحبة
كافي يادنيا صيام
هو
هم كافي تعبت من الكتابة هههه
