محتاجك كبل موهسه وكتك فات
قبل سنين جيتك اتانيهه
انه ماصدكت تنطبك عيني شلون
ارد افتح جفنهه وكوه اصحيهه
غض عيونك وشردني خل ارتاح
وانه عيوني عنك راح الهيهه
واحلفلي شبه حتى اقتنع غلطان
كفارة اليحلف تالي يطيهه
وبعدلاتلتفت للموتى اليمرون
اذا لاكتك روحي بدون راعيهه
من اكلك رايح ابرد حتى اظل زعلان
احزن بس حسرتك عني تخفيهه
ولاتقرا شعر يمي ولو لحظات
سمعني سوالف وزن مابيهه
رد لذكرياتي وسد عليك الباب
والأسوار البطولك راح اعليه
ادمن علنفس بس مره اذاجريت
نفسي ومن هوا اسمك ريتي امليهه
طفيتك جمر كوه بطلاع الروح
من الدخان سوده الدمعه البجيهه
حبني براحتك كون انه مووياك
وادوارالضحيه لغيري خليهه
خضت التجربه وضكت الخساره شلون
مره شما خطتهه ورت احليهه
بالقدره كدرت انسى سهل ذكراك
احذر من صورك خاف احاجيهه
انه مثل الخرز عندي الجروح انواع
كل واحد بحاله وميزه يحويهه
حمل بس الثكل مرات هم مطلوب
اليطر الكواغد خفة البيهه
حبني براحتك جنك اتزور كبور
مااملك دموع كبالك ابجيهه
تدري من الغصن كل الطيور اتطير
اذا بس مره وحده الجيله تخطيهه
حبني بلا سبب وبدون كل غايات
هيج بلا مقابل لله سويها
موكل الزرع مسموح الك تحويه
اي فلاح اسأله الورده يحويهه
يلبروحك قفص ضجة بلابل بيه
انه روحي العناكب عشعشت بيهه
اريد ادخل كلب ماألكه بيه تمثال
وأسأل عل حضاره ويمته بانيهه
ماريد اليضحي بروحه بس احتاج
نص التضحيات الجنت اضحيهه.
