مساجلة في الابوذيه الابوذيه فاكهة المجالس والدواوين

[ابو مناف البصري]

1
سطرني البين ياصاحب شلعضاي
عيني؛ وماكفاه وَلْحَگ شلعضاي
اليطيح اعضاه تفزعله شلعضاي
عندي؛وصارو الشمات اليّه
مالك السرحان / البصرة الفيحاء
2
حياك الله اخوي مالك:
لا تستغربه وكتك لو عضاك_
_بطرف نابه... وطرش بذنه لوعظاك
المثلك حيد الك يگلط لوه عضاك
على الچنها يطر زيج الثنيه
الشاعر سيد يوسف الكوبعي / قضاء الفهود الگوبع
3
شلفاني وما عرفت شلون منهاي
هلك فرضو عليه حظر منهاي
شفرزن كمت بعدك ذيج منهاي
هاي وذيچ نفس الوجع بيه
الشاعر سلام المرياني/ ميسان قضاء المجر الكبير
4
لو اعظاك
لون اعضاك كل تسمع لوعظاك
وتهد متحزمه بموزر لوعظاك
جلب چا عاشوا بهيبه لوعضاك
اوكفو وياك وكفات الحميه
الشاعر قطران السعيدي/ قضاء الدواية
5
ابعيون الحسد يامالك لمع ضاي
طرحني وحيف ماطاعن لما عضاي ؟
ابتشر كل شامت وهيع لم عضاي
اضحكو مابيهم النغار اليه
الشاعر هاني الجوراني/ لندن
6
إشيطلبك ليش وبنابه شلعضاك
الدونـي! وعمدآ وبيده شلعضاك
الگلبك! وبزهر حقده شلعضاك
إلچنت وياه اخ معنه الخويــــه؛؛؛
اخوك ابوامير فرحان الكلابي/ النجف الاشرف
7
عليّ .. مدري . النوايب لفن شلهن
وعفه . گلبي . هموم الوكت شلهن
تهرت گامت جروحي شلون شلهن
ششل .. يترادفن .. گامن .. عليه
الشاعر طالب الفرحان/ الشطرة
8
الي فكر الوقد ثوره ولع ظاي
اعلربعي اتنومس بهاذي ولعظاي
يصاحب هذا الك شوري ولعظاي
تمسَّك بالأصيل بلاتقيه
الحاج ابوالزاير
الشيخ اللواء صالح ال شنان/ سوق الشيوخ
9
اذا دهرك طفه عينك شلعضاك
واذا مشلول ماتكدر. شلعضاك
يمالك شلك اتحشم. شلعضاك
اذا ماكو رجه بهاي الخويه
عسى ان يعجبك هذا الرد
الشاعر ابو مصطفى العبودي/ الشطرة
10
عضني الوكت ياصاحب.. لمعضاي
التهبت ماشفت واحد... لمعضاي
بهندس عايش اولاصح.. لمعضاي
خرابة اوعشعشت غربان بيه
الشاعر عدنان الجابري / النجف الاشرف الحيدرية.
11
اوعضه ومايفيد اوياه وعضاي
هذاك الرخصتله الروح وعضاي
الرفاگه اشمتوا ياحيف وعضاي
على العمله العملها وخان بيه
قلمي مباشر ابوحيدر المرياني/ البصراوي
12
حطّن يارزايا البين وشلَن
وأكسرَن كل كتر بعضاي وشلَن
البيابي أبيوم رك الحيل وشلَن
يَهام الشوف دوب أيلوح إليّه
الشاعر ياسين الغزي الغزي /ذي قار
13
يطشر وكتي ياخويه لم عضاي
أشوف إبعين شماتي لمـع ضاي
آخ اسمعهن يصيحن لِما عضاي
يصيحن من تِلِم بيهن عليـه
عدنان الغريباوي
العطيـّـه / بغداد
14
النصح مانفع ذاك وكثر وعضاي
بيهم ودليل نمرد وعظاي
طحت والغرب ماقصروا وعظاي
بديهم شبوا النيران ... بيه
الشاعر الشاعر علي الخيكاني / سوق الشيوخ
15
ايخسن شنهو المصايب مالوني
اشتظن الهم اطبّع مال اوني
اياوني الهضمني مالوني
وي النفس رايح راد بيه
رشيد ابو احمد الخفاجي/ الناصرية
16
كل شده اذا تصعب لها اعضاي
ومثل رفت شواربهم لها اعضاي
رفيف .وشع وسط ضلمه لها اعضاي
اصيرن هيچ اشع لجل الخويه
الشاعر ابو هاني الدريعي ذي قار
17
دمغني البين يامالك لما ضاع
راسي ابوحل ماخله لمو ضاع
لون كالولي اسم الله لماضاع
اسلاحي كون ربعي فزعت ليه
الشاعرابو علي عايد الخفاجي الخفاجي/الغراف
18
اخذ درس الزمان الچان يوعظ
احفظه ولاتردله اردود يوعظ
اذا چلبك لايدك نهش يوعظ
اقره اعله الوفه بعد التحيه
الشاعر حكيم خلف جيجان الگوبعي/ ذي قار الگوبع
19
ترة المثلك صدگ بالناس يندار
دوة ذچرك اوفوگ الجرح يندار
على لسانك جميل الشعر يندار
تطشه اتگول طشة واهليه
ابو مصطفى الغزالي/ كربلاء المقدسة
20
يسيد من تعد العضاك. وعضاك
ينشدنك بعد صوتين. وعضاك
رعد طوسي اونا ضليت. وعضاك
الك بهل السماوه اصوات ابدويه
خالد غضبان المطوكي /المثنى
21
بروحك نار ضنيته ولعضاي
وفراشة الروح يجذبها ولعضاي
غسلت الايد لاروحي ولعضاي
طحت وثنينهن وجن سويه
الشاعر علي سلمان الحزامي
22
احس ضلعي ابرحيله شلمنّي
امس والعين فصها شلمني
الوكت شيريد ناصب شلمني
يسويّ من النفس مرجوحه اليه
الشاعر سالم الحمداني /سوق الشيوخ
23
الشامت من عبر يمّك وشلّاك
بعد شتريد من عندي وشلاك
عُمَرت آنه شل الخوه وشلاك
طاحت من نظر شامت اليه
الشاعر سالم الحمداني/ سوق الشيوخ
24
المصيبه الرمح بضلوعي٠٠بجوياي
اخـوي العلي مـا كـاطع٠٠٠بجوياي
الهضيمه من بجيت انه ٠٠بجوياي
بعد شيفيد لو كفهن عليه
الشاعر سيف زياره الحاتمي/ ذي قار

25
ابضرس مندوم مابگه شفه عضاي
الي ، ولا لي بعمر هندس شفع ضاي
سكيمه ولا عرف عارف شفه عضاي
ابدوه ، وبس الوصل منعوت اليه
وجدي الناصح الميساني ابن المجر الكبير / استراليا حاليا ٥/١/٢٠٢٥

26
كلف لوصاب طگ ألدهر بعضاه
يــهـد ألحيد حيلـه ويشل بعضاه
أليطيح ومـا امسوي زين بعضاه
يضل داغــور تــايهه بــالـثنـــيه
#آبـوོسـجــادོألـسـراي₰ ͜ ✎ོذي قار
27
اود كلمن نصحني وليعظني
وعلا الله الراح مني وليعظني
اسافه النكت بيه وليعظني
اخوي الجنت اشيله بذني اديه
كاظم الزيدي/ الشطرة
28
إلك من وَرَد مرسالك ولع ضاك
بدليلي. وحرت إلك شكتب ولعضاك
أبد مـاودّي أرشدنَّـك ولعضــاك
بسبب لنّك لبيب بكل قضيه
الشاعر احمد السعيدي/ کرمة بني سعيد
29
بقربطني الوكت واطلع حشاها
وعلل وهموم لاتوصف حشاها
ولديعگوب حيل ارحم حشاها
تسوي اسواية الخلان بيه
َالشيخ ابو غيث العبادي/ كربلاء المقدسه
30
المواعظ تثمر بوادم ونعضاي
بسراب وصبعي ماميز ونعضاي
اليطيح اعضاه تفزعله ونعضاي
طحت وجدامهم سحگن عليه
الشاعر ابو اكرم الگريزي/ ميسان
31
وحگ الطاح والچف طبع بالواه
مـــن ينظر بلوتي تــهون بالـواه
ماتـــرضه يلهي الكــــون بالواه
العمر يگضي وبـلوتي ذيچ هيه
الشاعرتوفيق المالكي/ سوق الشيوخ
32
اله ناب الدهر يدمي.........وعضني
بيميني ولا رفيج الي....... وعضني
انفض ماضل الي عاضه.. وعضني
مشو تحت الثره وناري سريه
الشاعر حيدر العبيدي/ ناصريه حي الشموخ
33
اظلم هالوكت ماله .... منع ضاه
عني وحال اليعاني ..... منعضاه
ادور عاللذي يرشد ...... منعضاه
ويوصيه بردات الحال بيه
الشاعر علي الحاج/ الشطرة
34
واعظ خلني اصيرن لك وعضّاك
لاتجبر على العسره وعضّاك
اعضاك الردته يبوسك وعضّاك
يمالك بالهوى كلنه ....سويه
قلمي/ جاسم محمد الفزي ذي قار
35
الوكت ما علماني دروس وعضاي
رغم كشر انيابه بتوز وعضاي
الچنت حاسبهم يوافون وعضاي
بسمل منشار ويگصون بيه
الشاعر رحيم السهلاني/. ذي قار
36
يمي وحشمتكم بسله كلكم
ونه الخلصته عمري بسلكلكم
بعد خلو اديكم بس لكلكم
المراجل فعل موش لسان هيه
الشاعر شهيد الجهلاوي./ الشطرة
37
طحت والمرض ياصاحب كلعضاي
وكيوسف صبحو ضدي كلعضاي
الشامت من نشد يولك كلعضاي
ولا واحد اياني ومر عليّه
الشاعر رعد الاسدي.الچبايش
38
المصايب چم سهم بحشاي خلان
اكتمت سري وعلي مايوم خلان
التسد خلات للخلان،،،،،،،،،،،خلان
وانا فوگ الخلل شمات ،،،،،،،بيه
الشاعر ابوجلال الحواسي قضاء الغراف / ذي قار

توثيق مالك السرحان آل هاشم الطويلاوي
1/1/2025

 

[شَمَّـمْ🤍]

مشكور ع الطرح ..

تحياتي ،

 

[Retaj Al-Hassan]

عآآشـت آلآيآدي

يسـلمـووو ع آلنقل