((مساطب جامعة بغداد))

[آهاات حالمة]

((مساطب جامعة بغداد))


على خشبة مساطب جامعة بغداد
اتعاهدنه اوحلفنه اوزادنه اتملح
دوخني كلامك شمر بيه ابعيد
اتحبني..مشتريني..غيري مايصلح
گضيت اربع اسنين ابمسرح الاوهام
اجت سنت التخرج حرگت المسرح
مو انته الاعرفك مدري اعرفك زين
انته الجنت واضح مدري صرت اوضح
ضاعت لهفتك صفنه ابوجه عميان
مامشتاگ يمكن.لا على الارجح
لفيت الشهاده اوردت بس اتروح
اظن وقتك ثمين اوگام مايسمح
ارحم ساعتك لتباوعلهه اهواي
الوقت كالسيف عدك خاف نتذبح!!
تسأل ليش راسب؟آنه اگلك ليش
حبيتك صدگ وليحب ماينجح
وكت الجنت تقره اوتنسأل وتگوم
وتعيد الدرس وتناقش وتشرح
آنه اسأل ابروحي اشبعد ونلاگيه
وناقشهه شجاوب لو علي صبح
عالصبوره عيني اوعقلي كله اوياك
عين ابلا دماغ. اشتجمع اشتطرح
اولأن گاعد وراي اوما اشوفك زين
رضيت النفسي اصير ابخانة الوكح
متفوق ابحبك آنه مو كسلان
خلصت الدوام ابوجهك اتصفح
تكتب ولشعر يسرح على الوجنات
من باب التضامن انشده واسرح
اگطعلك ورد مثل الطفل واهديك
وعمال الحديقه السانهم يجرح
غلطو وشتكو وتعهدت مجبور
گمت اضرب حصص ووياهم اتفلح
اصعد على الشجره واكتب اسمك فوگ
مو شغله بطر .بس ردته يتمرجح
طردت امنلحلام اهواي ناس اعزاز
خليتك الوحدك تسرح اوتمرح
انام المغربيه ابعيد درب الليل
وامي اتگلي دنيه اغروب مايصلح
لا يصلح گلت خالفت اغلى الناس
كلت غلطان امي وامي رب الصح
ليش..ابطرگ ليش انتهت قصتي اوياك
واسف يتبع اسف وبأسف يتلقح
اسف يتبع اسف وبأسف يتلقح
​

 

[قيصر الحب]

رد: ((مساطب جامعة بغداد))

كل الشكر والامتنان على روعهـ بوحـكـ
..
وروعهـ مانــثرت .. وجماليهـ طرحكـ

 

[MS.Shaghaf]

رد: ((مساطب جامعة بغداد))

راقت لي كلماتك من أول عنقود لآخره



دمتي في حمى الرحمن



تقبلي وافر أحتراماتي

 

[آهاات حالمة]

رد: ((مساطب جامعة بغداد))


شكرا للمرور العطر
نورتوا الموضوع
تحيتي لكم

 

[كيان الم]

رد: ((مساطب جامعة بغداد))

مااجمل ماتحمله من احساس
كلمات تخترق القلب بصدقها
وتسلب من العيون كامل اعجابها
سلمت يمينك ياالق
يعطيك العافيه
لروحك السعادة
تحيتي