من يفقد اعصابه على ادناة ماجاه

[الرااااكد]

من يفقد اعصابه على ادناة ماجاه
تأكد ان نفسه حزينه كتومه


لا تسأل اللي منغبن عن نواياه
قدّر ظروفه وان زعل لا تلومه


ولا تحرجه ، ولا تحدّه على أقصاه
ولا تجرحه ، ولا تفرّح خصومه


واضح ، ولا يحتاج فترة وتقراه
جالس ، ونظاراته تقول امْحرومه


قلبه جريح ، وخانه الوقت وأعياه
بتهاجمه ؟ أجل تحمّل هجومه


لا تقول وش علمه ولا تتبع اخطاه
ادخل وسط قلبه ، وتعرف علومه


تجيه رايق وانت تجهل خفاياه
وتشيّن اخلاقه وتنبش اهمومه


ياخوي ، من صمته تبان المعاناه
يمكن لو إلحاله ، يشقق هدومه


هذا يقضّي ليلته فـ المحاتاه
يوم أنت مدّيها بسبعين نومه


اركد ترا التهميش وإلّا مبالاه
بالشخص ، كنّك بايعه بأي سومه


تراها مستويه معه ، جاه من جاه
شجاع ، لكن طايحاتٍ اعْزومه


هذا قبل لو تعرفه ما تعدّاه
من طيب راسه من جمايل اسلومه


شوفه زمان المهزله وين ودّاه
ودّاه للوحده وغير انجومه


اليا نطق في قلبك تقول عزاه
ماهو على بعضه ولا هو بيومه


يضحك دقيقه ، وان ذكر جور دنياه
يسرح مع اوجاعه برفقة احْلومه


يرجع يفكر في نصيبه وبلواه
تقول طير عاد عقب حومه



ياصاحبي لا تنشده عن سواياه
ماضي حزين وبيّناتٍ ارسومه


ان ما قدرت بوقفتك تمسح بكاه
طالبك طلبه لا تنبّش اعلومه


ارفع يدينك واترك الأمر للاه
أبيك تدعي له بنفسٍ رحومه


ولا جاك ملقوفٍ يبّحث خفاياه
اللي على العالم يسدّد اسهومه


لا تضعفه دام الشجاعه بيمناه
قلّه يبي ربّك يفرّج اهمومه

م ن​

 

[رمااد اانسان]

اختيار موفق يستحق الشكر والثناء
سلمت يداك على النقل والمجهود
أرق تحية طيبة

 

[الرااااكد]

اختيار موفق يستحق الشكر والثناء
سلمت يداك على النقل والمجهود
أرق تحية طيبة

العفوو الغالي
رماد إنسان يسعدني
انك هنا

 

[آهات حالمه]

سلمت يداك على روعة الطرح
وسلم لنا ذوقك الراقي على جمال الاختيار
لك ولحضورك الجميل كل الشكر والتقدير
اسأل الباري لك سعادة دائمة
ودي وتقديري لسموك

 

[الرااااكد]

سلمت يداك على روعة الطرح
وسلم لنا ذوقك الراقي على جمال الاختيار
لك ولحضورك الجميل كل الشكر والتقدير
اسأل الباري لك سعادة دائمة
ودي وتقديري لسموك

انرتي فاصلتي
آهات شاكرين لكم
توااصلكم دمتم بوود
لاخلا ولاعدم