إمعمر إمن الحزن جمره ..
وضايع إبدخان أمس
والقمچي ملموم إبشليلك
چن گصيبة شمس
تلهث ...
ضبه صفره ..
أو ضبه كلّش ذهب حمره
والمعسل طرب ..
فوگ العگل یرگص
عرس گمره
كل نفس ...
چنك إتشم بغداد كلها
أو من ترد النفس چنك عطبت
ضاع العمر
صارت رجعتك للوطن چنها غربتك
حيل مره
كل التريده من الايام ..
تگعد عله دجلة
وتبچي وحدك على كلشي
وتبتسملك طفله ..
بعده النهر ينگط من گصایبها الگصيره
لا يعمي هاي بغداد التحبها
وإنت ماطول الفرات ودجلة يجرن
روح خضره
تنكش النرگيله ..
تلگاها إنطفت مثلك
دخذلك نفس عالمامش
وخلي الماي إيگرگر
على إعناد العمر ..
والموت اللي گاعد غاد متغتر إبغتره
مظفر النواب..
