نموت بس ما نفتِرِگْ

[آهات حالمه]

يبو دانگ دور بينه
خل نرد لبيوت اهلنه
عيونهم هدوة مسية
وطيف من فرحة جهلنه
بينه كل شاطي يِرِفْ
عالنهر ماشه وزِلِف
إحنه تضفرنه الليالي
والفجر شمسه تِفِلْنه
يبو دانگ دور بينه
خل نرد لبيوت أهلنه
*
يبو دانگ دور بينه
هذا ليل وذاك ليل
واحنه بالنهران شهگه
وشهگة النهران هيل
بيوت اهلنه من البِعِدْ
عنبر وجمرة سِعِد
وگاعنه، تخضّرْ سنابل
تبتسم كلما زعلنه
يبو دانگ دور بينه
خل نرد لبيوت اهلنه
*
يبو دانگ عشنه دنيا
بيها حربين وعِشِگْ
وچِنَّه نحلف بالضريح
نموت بس ما نفتِرِگْ
وخبزة خدودي حنين
والعمر تنّور طين
چِنّه فِقرة وصِرْنه فقرة
وجَرَّح العاگول أملنه
يبو دانگ دور بينه
خل نرد لبيوت اهلنه
*
يبو دانگ دور بينه
نحِطْ على البِنّي مِلِحْ
الليل ثوب محمِداوي
ودمعة السِنْبِلْ فِلِحْ
آنه بدموعي زِلِمْ
تموت بس ما تِنْثِلِمْ
ونلطم .. آخر ثوب ..
آخر ثوب بالدنيا هِدَلْنه
يبو دانگ دور بينه
خل نرد لبيوت اهلنه







عامر عاصي

 

[الرااااكد]

طرح جميل
تسسلم الايادي
الموقره آهات لاخلا
ولاعدم
نشاط ملحوض تشكري
عليه